KDMC students now worry about nutrition After uniform delay



( प्रगत भारत । pragatbharat.com)

म. टा. वृत्तसेवा, कल्याण

कल्याण-डोंबिवली महापालिकेच्या शाळांपेक्षा खासगी शाळांकडे विद्यार्थी आणि पालकांचा ओढा वाढल्याने पालिकेच्या शाळांना घरघर लागली आहे. विद्यार्थीसंख्या वाढविण्याचे उद्दिष्ट शिक्षकांनी यंदाच्या वर्षी काही प्रमाणात गाठले असले तरी पालिका प्रशासन मात्र शिक्षणाच्या बाबतीत उदास असल्याचे चित्र आहे. पालिकेच्या शाळेत शिकणाऱ्या विद्यार्थ्यांना सहा महिन्यांचा कालावधी उलटल्यानंतर मंगळवारी अखेर गणवेशवाटप सुरू झाले असले तरी पोषण आहार लालफितीतच अडकला आहे. मधल्या सुट्टीत या गरीब घरातील मुलांना पोषण आहार देण्यासाठीही पालिकेकडे पैसा नसावा, याबाबत पालकांनी आणि नागरिकांनी संताप व्यक्त केला आहे. पोषण आहारासाठी निधी नसल्याचे कारण शिक्षण विभागातील अधिकारी देत आहेत.

कल्याण-डोंबिवली महापालिकेच्या शाळांमध्ये सुमारे साडेनऊ हजार विद्यार्थी शिकत आहेत. मात्र विद्यार्थ्यांची संख्या घसरत असल्याने शिक्षकांना विद्यार्थी वाढविण्याचे उद्दिष्ट देण्यात आले होते. यानंतर यंदाच्या शैक्षणिक वर्षात पालिका शाळांमध्ये ३५०० विद्यार्थी वाढले. करोनाकाळात पालकांवर आलेल्या आर्थिक संकटामुळेही पालक पालिका शाळांकडे वळले आहेत.

मात्र या विद्यार्थ्यांना शैक्षणिक सुविधा देण्याबाबत पालिकेचे धोरण उदासीनच राहिले आहे. इतर शाळांमध्ये विद्यार्थ्यांना जून महिन्यात शाळेच्या पहिल्या दिवशी गणवेश, वह्या–पुस्तके, बूट, रेनकोट दिले जातात. मात्र कल्याण-डोंबिवली महापालिकेच्या विद्यार्थ्यांना दरवर्षीच शैक्षणिक साहित्याची प्रतीक्षा करावी लागते. मागील दोन वर्षे शाळा बंद असल्याने विद्यार्थ्यांकडे मागील वर्षीचा गणवेश नव्हता. यामुळे शाळा सुरू झाल्यापासून विद्यार्थी गणवेशाविनाच शाळेत जात आहेत.

पालिकेचे तत्कालीन शिक्षण विभागाचे उपायुक्त दीर्घ रजेवर गेल्याचे कारण देत गणवेशाची फाइल प्रलंबित ठेवण्यात आली होती. त्यानंतर उपायुक्तांच्या जबाबदाऱ्या बदलण्यात आल्याने गणवेशाचा मुहूर्त लांबला होता. अखेर दिवाळीच्या सुट्टीत विद्यार्थ्यांच्या गणवेशाचा प्रश्न मार्गी लावत अखेर मंगळवारपासून विद्यार्थ्यांना गणवेशाचे वाटप सुरू करण्यात आले आहे.

अरेरे! महापालिकेच्या निम्म्या विद्यार्थ्यांवर स्वेटरविना कुडकुडण्याची वेळ
दहावी-बारावीच्या विद्यार्थ्यांना परीक्षेसाठी मिळणारी ‘ही’ सुविधा रद्द
यामुळे निम्मे वर्ष उलटल्यानंतर पालिकेचे विद्यार्थी गणवेशात शाळेची पायरी चढणार आहेत. मात्र यंदा बुटाचा प्रस्ताव मागे ठेवण्यात आला असून पावसाळ्यात दरवर्षी दिले जाणारे रेनकोटही विद्यार्थ्यांना अखेरपर्यंत मिळालेच नाहीत.

पालिकेच्या शाळेत शिकणारे विद्यार्थी हे गरीब घरातील असून दोन वेळचे अन्न देताना पालकांची दमछाक होते. त्यामुळे या विद्यार्थ्यांना पोषक आहाराची आवश्यकता असते. विद्यार्थ्यांना शाळेची गोडी लागावी, यासाठी शाळेत मधल्या सुट्टीत चिक्कीसारखा पोषण आहार देण्याचा प्रस्ताव लोकप्रतिनिधींकडून मांडण्यात आला होता. करोनापूर्वी विद्यार्थ्यांना शाळेत पोषण आहार मिळत होता, मात्र यंदा पोषण आहारालाही कात्री लावण्यात आली आहे.

विद्यार्थ्यांच्या पोषण आहारासाठी अंदाजपत्रकात निधीच नसल्याचे कारण प्रशासनाकडून दिले जात असल्याचे शिक्षण विभागातील अधिकाऱ्यांचे म्हणणे आहे. कोट्यवधी रुपयांची उलाढाल करणाऱ्या पालिकेत विद्यार्थ्यांना पोषण आहार देण्यासाठीही निधी नसावा, याबाबत आश्चर्य आणि संताप व्यक्त होत आहे.

निधीची तरतूद नाही

पोषण आहाराबाबत शिक्षणाधिकाऱ्यांना विचारले असता, त्यांनी मंगळवारपासून गणवेशवाटपास सुरुवात करण्यात आली असून पोषण आहाराची फाइल अद्याप मंजूर झालेली नाही, असे सांगितले. अंदाजपत्रकात यासाठी निधीची तरतूद केली नसल्याने यंदा कदाचित विद्यार्थ्यांना पोषण आहार देता येणार नाही, असेही ते म्हणाले.

धक्कादायक! पालिका शाळेतील विद्यार्थ्यांना पाठ्यपुस्तके नाहीतच

Related posts