times group vice-chairman samir jain : मोदी, शहा करतील महाअखंड भारताचे निर्माण; ‘टाइम्स नाउ समिट’मध्ये समीर जैन यांचे प्रतिपादन – modi, shah will make maha akhand bharat, says times group vice-chairman samir jain



( प्रगत भारत । pragatbharat.com)

नवी दिल्ली : ‘भारताने जगाला अहिंसा आणि शांतीचा संदेश दिला आणि हाच भारतीय संस्कृती आणि अध्यात्माचा पाया आहे,’ असे प्रतिपादन ‘टाइम्स ऑफ इंडिया’ समूहाचे उपाध्यक्ष आणि व्यवस्थापकीय संचालक समीर जैन यांनी केले. ‘टाइम्स नाउ समिट’च्या उद्घाटनावेळी ते बोलत होते. ‘पंतप्रधान नरेंद्र मोदी आणि गृहमंत्री अमित शहा यांची जोडी म्हणजे राम-लक्ष्मणाची जोडी आहे. या दोघांच्या नेतृत्वामध्ये भारत शांती आणि अहिंसेचे एक प्रतीक म्हणून पुढे येईल आणि जगात स्वत:चे अस्तित्व निर्माण करील,’ असेही जैन या वेळी म्हणाले.

समीर जैन म्हणाले, ‘राष्ट्रपिता महात्मा गांधींनी जगाला जे अहिंसेचे तत्त्व दिले त्याचे मूळ ते तीन हजार वर्षांपूर्वीच्या महावीर आणि बुद्ध यांच्या काळात आहे. आपले सर्व धर्मग्रंथ आणि ग्रंथ अहिंसेबद्दल बोलतात. मनुष्याचे मूळ स्वरूप हिंसेचे आहे; परंतु त्याचा विकास होत गेला, की तो अहिंसेच्या दिशेने वाटचाल करू लागतो. युद्ध आणि हिंसेपेक्षा भारतीय संस्कृती शांततेला महत्त्व देते. जो लढून किंवा स्वसंरक्षणात जिंकतो त्याला वीर म्हणतात; मात्र जो शांततेच्या प्रस्तावाने जिंकतो, त्याला तुम्ही महावीर म्हणता. सध्याचा काळ युद्धाचा नाही, हा पंतप्रधान नरेंद्र मोदी यांनी दिलेला सल्ला जगभर चर्चिला गेला. त्यांनी दिलेला सल्ला हीच भारतीय संस्कृती आहे. भारतीय प्राचीन परंपरेमध्ये युद्धाचे समर्थन करण्यात आलेले नाही. भारतानेही कधीच प्रतिपक्षावरील आक्रमणाला पाठिंबा दिला नाही. आक्रमण झाले, तर मात्र आपण त्याला उत्तर देतो, ही आपली संस्कृती आहे.’

जैन यांनी या वेळी महाभारताचे उदाहरण दिले. ‘आक्रमणाला उत्तर दे, असे श्रीकृष्णाने अर्जुनाला सांगितले. कृष्णाने कधीही आक्रमण कसे करायचे याचे शिक्षण दिले नाही,’ असे ते म्हणाले. युद्ध आणि संरक्षण यांतील फरक अधोरेखित करताना जैन म्हणाले, ‘ब्रिटनमध्ये जेथे युद्धाशी संबंधित मंत्रालयाला युद्ध मंत्रालय म्हटले जाते, तेथे आपल्याकडे संरक्षण मंत्रालय असे म्हटले जाते. शांतता आणि अहिंसा अखंड भारताची ओळख होती. सध्याच्या बालीपासून ते अफगाणिस्तानपर्यंत हीच ओळख कायम होती. अहिंसा हा जैन धर्माच्या अनेकांतवादाचा गाभा आहे. प्रत्येक मत, प्रत्येक वादविवाद आणि प्रत्येक विचार अनेकांतवादात योग्य मानला गेला आहे. प्रत्येक दृष्टिकोनाला, विचाराला आणि प्रत्येक व्यक्तीला वाव असतो. ज्याप्रमाणे कुटुंबातील प्रत्येक व्यक्तीची जागा नक्की असते. मुले, वृद्ध, कमावते, न कमावते असे सगळे जण कुटुंबात असतात. त्याप्रमाणेच राष्ट्रांत सर्व विचारसरणी, सर्व धर्म यांना स्थान आहे. मातृभाषेतून शिक्षण अतिशय महत्त्वाचे आहे. मोदी सरकारने मेडिकलचे शिक्षण हिंदीमध्ये सुरू करण्याचा निर्णय अतिशय चांगला आहे. कोणतीही व्यक्ती आपल्या मातृभाषेत उत्तम पद्धतीने व्यक्त होतो. देशातील सर्व भाषांना महत्त्व दिले गेले पाहिजे.’

‘महाअखंड भारत गरजेचा’


राष्ट्रीय स्वयंसेवक संघाचा अखंड महाभारताचा विचार पुढे नेऊन समीर जैन यांनी ‘महाअखंड भारत’ साकार करण्याची गरज व्यक्त केली. ‘अखंड भारत हा आता इतिहासजमा झाला असून, आता आपल्याला महाअखंड भारत बनवायचा आहे,’ असे ते म्हणाले. ब्रिटनचे उदाहरण देऊन जैन म्हणाले, ‘चारशे वर्षांपूर्वी आपल्या बिहारएवढ्या आकाराचा असलेल्या ब्रिटनने महान होण्याचा संकल्प केला आणि चारशे वर्षे जगावर अधिराज्य गाजवले. गेले शतक ब्रिटनचे होते; परंतु सध्याचे शतक भारताचे असेल,’ असे जैन यांनी सांगितले.

‘अध्यात्म, आयुर्वेदाला महत्त्व’


‘भारतीय अध्यात्म, संस्कृती, आपले शास्त्रीय संगीत, नृत्य आणि आयुर्वेद सध्या जगात सर्वत्र लोकप्रिय आहे. अनेक अमेरिकी रुग्णालये आणि वैद्यकीय महाविद्यालयांमध्ये, रुग्णांना योग आणि ध्यान शिकवले जात आहे. एक हजार डॉलर खर्च करून याचे शिक्षण घेतले जाते. आज पाश्चिमात्य देशांमध्ये अध्यात्माची चर्चा सतत वाढत आहे. गीता, अष्टावक्र, योग वशिष्ठ, पतंजली सूत्र या सर्वांचा अभ्यास तेथे केला जात आहे. अखंड भारत या आपल्या संस्कृतीचा प्रभाव वाढत चालला आहे,’ असे जैन म्हणाले.

‘यश एका दिवसात मिळत नाही’


माजी पंतप्रधान अटलबिहारी वाजपेयी यांच्या ‘अंधेरा छटेगा, सूरज निकलेगा, कमल खिलेगा,’ या कवितेच्या ओळींचा संदर्भ देऊन समीर जैन म्हणाले, ‘वाजपेयीजी जेव्हा हे बोलले तेव्हा अमित शहा त्या वेळी आपल्या राजकीय कारकिर्दीची सुरुवात करीत होते; परंतु त्यांनी आपल्या मेहनतीने आणि उर्जेने देशाच्या सर्व भागात ‘कमळा’चे वर्चस्व फुलवले. यश एका दिवसात येत नाही. मात्र, ते एक दिवस नक्की येईल, हा विश्वास अमित शहा यांच्याकडे पाहून नक्की मिळतो.’



Related posts