[ad_1]
( प्रगत भारत । pragatbharat.com)
Pune Crime News : आषाढी वारीसाठीवारकरी सज्ज झाले आहेत. आज संत तुकाराम महाराजांच्या पालखीचं प्रस्थान होणार आहे तर उद्या संत ज्ञानेश्वर महाराजांच्या पालखीचं प्रस्थान होणार आहे. लाखो वारकरी या सोहळ्यासाठी उत्सुक आहेत. वारी सोहळ्यासाठी प्रशासनाकडून संपूर्ण तयारी करण्यात आली आहे. त्यासोबतच सुरक्षेसाठी पोलीस फाटादेखील तैनात करण्यात आला आहे. याच पोलिसांनी वारीच्या पार्श्वभूमीवर भुरट्या मोबाईल चोरांवर कारवाई केली आहे. वारकऱ्यांच्या सुरक्षेसाठी पोलिसांकडून कोणतीही करस सोडणार नसल्याचं यावरुन दिसत आहे.
12 जून रोजी शहरात येणार्‍या पालखी मिरवणुकीसाठी पुणे पोलीस सज्ज झाले आहेत. हडपसर आणि वानवडी पोलीस ठाण्याच्या परिसरात पोलीस गस्त घालत असताना गुन्हे शाखेच्या युनिट 5 ला दरोडेखोरांच्या टोळीची माहिती मिळाली. गर्दीचा फायदा घेत वारी मिरवणुकीत सहभागी होणाऱ्या व्यक्तींना लुटण्याचा कट रचत होते. गुन्हे शाखेच्या पथकाने तत्परतेने कारवाई करत रविदर्शन चौकाजवळील राज्य परिवहन बसस्थानकावर थांबलेल्या दोन संशयितांची तपासणी केली.
संशयित श्रीकांत राजू जाधव (वय 21, रा. मुंढवा) आणि दिलीप बलभीम गायकवाड (वय 33, रा. मुंढवा) या दोघांनी एकूण एक लाख 10 हजार रुपये किमतीचे सात चोरीचे मोबाईल पोलिसांना दिले. पोलिसांनी जप्त केलेल्या मोबाईल फोन्सबाबत आरोपींकडे चौकशी केली, मात्र ते उत्तर देऊ शकले नाहीत. अधिक तपास केला असता पुण्यातील हडपसर, मुंढवा, बंडगार्डन, बिबवेवाडी परिसरातून मोबाईल चोरीला गेल्याचे समोर आले. चोरीचे मोबाईल कर्नाटकात पोहोचवण्याचा संशयितांचा इरादा होता. आषाढी वारीची पालखी मिरवणूक शहरात येताच चोरीच्या घटना घडवण्याचा त्यांचा हेतू होता, असेही तपासात उघड झाले.
चोरीला गेलेल्या मोबाईल संदर्भात हडपसर, मुंढवा, बंडगार्डन आणि बिबवेवाडी पोलीस ठाण्यात भारतीय दंड संहिता (IPC) कलम 379 नुसार गुन्हे दाखल करण्यात आले.आरोपी श्रीकांत जाधव हा ऑन रेकॉर्ड गुन्हेगार असून घर फोडणे, खिसा मारणे, मोबाईल चोरी असे 24 हून अधिक गुन्हे दाखल आहेत.
पालखीवर CCTV आणि GPS सिस्टीम
मागील 300 वर्षांपासून महाराष्ट्राला वारीची परंपरा आहे. लाखो वारकरी दरवर्षी मोठ्या संख्येनं या वारीत सहभागी होतात. ऊन, वारा, पाऊस अंगावर घेत विठुरायाच्या दर्शनाला पायी चालत जातात.अनेक गावात वारीचा मुक्काम असतो. यादरम्यान अनेक गावांमध्ये वारीचं दर्शन घेण्यासाठी भाविक गर्दी करतात. या सगळ्या सोहळ्या दरम्यान पालखीची सुरक्षा चोखदार यांच्या हाती असते. कोणता अनुचित प्रकार घडू नये, वारकऱ्यांची एखादी गोष्ट हरवली तर चोखदार मदत करतात. या जीपीएस सिस्टीम आणि सीसीटीव्हीमुळे आता या चोखदारांचं काम सोपं झालं आहे.
[ad_2]
