Ind Vs Aus 1st T20i Preview, भारताची रंगीत तालीम आजपासून; वर्ल्डकप ऑस्ट्रेलियामध्ये, टीम इंडियाची तयारी घरातून – australia tour of india 2022 india vs australia 1st t20i ind vs aus preview and probable xi



( प्रगत भारत । pragatbharat.com)

मोहाली: मधल्या फळीतील फलंदाजांचे संयोजन कसे असावे, फलंदाजांची क्रमवारी, जोड्या कशा असाव्यात, सहावा गोलंदाज अशा प्रश्नांची उत्तरे आजपासून (मंगळवार) सुरू होणाऱ्या ऑस्ट्रेलियाविरुद्धच्या (india vs australia) तीन सामन्यांच्या टी-२० क्रिकेट मालिकेतून शोधण्याचा भारतीय संघाचा प्रयत्न असेल. ऑस्ट्रेलियाविरुद्ध आज रंगणाऱ्या टी-२० लढतीत उतरणारा भारताचा हा संघच वर्ल्ड कपमध्ये खेळणार आहे. त्यामुळे या मालिकेतील प्रत्येक खेळाडूला सर्वोत्तम कामगिरीवर भर द्यावा लागणार आहे.

ऑस्ट्रेलियात ऑक्टोबर-नोव्हेंबरमध्ये टी-२० वर्ल्ड कप (t20 world cup 2022) होणार आहे. त्याआधी भारतीय संघ सहा आंतरराष्ट्रीय टी-२० लढती खेळणार आहे. यातील प्रत्येक लढतही वर्ल्ड कपची रंगीत तालीम किंवा सराव सामना म्हणूनच बघितला जाईल. गेल्या रविवारीच माध्यमांशी संवाद साधताना भारताचा कर्णधार रोहित शर्माने सलामीच्या फलंदाजांपासून काही गोष्टी स्पष्ट केल्या आहेत. ‘टी-२० क्रिकेटमध्ये लवचिकता महत्त्वाची असते. त्यामुळे खेळाडूंनी सामन्य़ातील परिस्थितीनुसार खेळायला हवे,’ याकडे रोहितने लक्ष वेधले आहे. त्याचबरोबर या सहा लढतींत फलंदाजीच्या आणि गोलंदाजीच्या शैलीत वेगळे प्रयोग करण्याची मुभाही रोहितने दिली आहे.

वाचा- भारतीय क्रिकेटपटूंचा पगार काहीच नाही; पाहा ऑस्ट्रेलियाच्या खेळाडूंना किती पगार मिळतो

सलामीला आपल्यासोबत लोकेश राहुलच येईल, असे स्पष्ट करताना रोहितने विराटही सलामीचा तिसरा पर्याय असू शकेल, असे सांगितले आहे. मात्र, ऑस्ट्रेलियाविरुद्ध विराटला सलामीला पाठविण्याचे डावपेच वापरले जाण्याची शक्यतादेखील नाकारता येत नाही. सलामीवीर, तिसरा आणि चौथ्या क्रमांकाचे फलंदाज जवळपास निश्चित असताना मधल्या फळीतील फलंदाजांबाबत अनिश्चिती दिसते. अंतिम अकरामध्ये नेहमीचा य़ष्टीरक्षक ऋषभ पंतला निवडायचे की ‘फिनिशर’ दिनेश कार्तिकला संधी द्यायची याचा निर्णयदेखील घ्यावा लागणार आहे. आशिया कपमध्ये कार्तिकला फारशी संधी मिळाली नव्हती. त्यामुळे वर्ल्ड कपआधी ‘मॅच प्रॅक्टिस’ देण्याच्या उद्देशाने कार्तिकला संधी मिळू शकते. दीपक हुडा आशिया कपमध्ये ‘सुपर ४’ फेरीतील सगळ्या लढतींमध्ये खेळला आहे. मात्र, संघातील त्याच्या भूमिकेविषयी अद्याप स्पष्टता नाही.

वाचा- रोहितने सलामीच्या जोडीचा वाद संपुष्टात आणला; पाहा विराट कोहलीबाबत काय म्हणाला…

आशिया कपदरम्यान अष्टपैलू रवींद्र जडेजा जायबंदी झाल्याने भारतीय संघाचा समतोल बिघडला आहे. पाच गोलंदाजांसह खेळण्याची वेळ टीम इंडियावर आली. जडेजाऐवजी संघात स्थान मिळवलेला अक्षर पटेलला हार्दिक पंड्यासह संधी मिळाली, तर भारताकडे अतिरिक्त गोलंदाजाचा पर्याय उपलब्ध होईल. जसप्रीत बुमराह आणि हर्षल पटेलच्या पुनरागमनाने भारताची गोलंदाजी कागदावर मजबूत झाली आहे. बुमराह, भुवनेश्वरकुमार, हर्षल पटेल आणि हार्दिक या वेगवान माऱ्यासह अक्षर आणि यझुवेंद्र चहल असे फिरकी गोलंदाजीचे दोन पर्याय रोहितपुढे उपलब्ध होतील. ऑस्ट्रेलियातील खेळपट्ट्या, वातावरण लक्षात घेतच भारताला मधल्याफळीसह संपूर्ण संघाची बांधणी करावी लागेल.

भारत दौऱ्यावर आलेल्या ऑस्ट्रेलियाने मात्र डेव्हिड वॉर्नरसह बऱ्याच खेळाडूंना विश्रांती दिली आहे. त्यामुळे कर्णधार अॅरन फिंचच्या कामगिरीवर लक्ष असेल. कामगिरी होत नसल्याने त्याने अलीकडेच वन-डेतून निवृत्ती घेतली आहे. टी-२० वर्ल्ड कपआधी सूर गवसण्यासाठी फिंच प्रयत्नशील असेल.

वाचा-फायनल मॅच आधी एक निनावी फोन आला आणि भारताने मॅच…; टीम इंडियाच्या माजी प्रशिक्षकाचा

टी-२० क्रमवारी

१ – भारत

६ – ऑस्ट्रेलिया

आमनेसामने

२३ टी-२०

१३ भारताचे विजय

९ ऑस्ट्रेलियाचे विजय

१ अनिर्णित

भारतात आमनेसामने

७ टी-२०

४ भारताचे विजय

३ ऑस्ट्रेलियाचे विजय

यातून होणार संघ निवड :

भारत – रोहित शर्मा (कर्णधार), लोकेश राहुल, विराट कोहली, सूर्यकुमार यादव, दीपक हुडा, ऋषभ पंत, दिनेश कार्तिक, हार्दिक पंड्या, आर. अश्विन, यझुवेंद्र चहल, अक्षर पटेल, भुवनेश्वरकुमार, हर्षल पटेल, दीपक चहर, जसप्रीत बुमराह, उमेश यादव.

ऑस्ट्रेलिया – ॲरन फिंच (कर्णधार), स्टीव्ह स्मिथ, शॉन ॲबॉट, ॲश्टन एगर, पॅट कमिन्स, टिम डेव्हिड, नॅथन एलिस, कॅमेरून ग्रीन, जोश हेझलवूड, जोश इंग्लिस, ग्लेन मॅक्सवेल, केन रिचर्डसन, डॅनिएल सॅम्स, मॅथ्यू वेड, ॲडम झाम्पा.

स्थळ : पीसीए स्टेडियम, मोहाली

वेळ : सायंकाळी ७.३० पासून

थेट प्रक्षेपण : स्टार स्पोर्टसवर

खेळपट्टीचा अंदाज

या मैदानावर तीन वर्षांनंतर टी-२० सामना होत आहे. येथील सरासरी धावसंख्या १७६ आहे. दवाचा परिणाम या लढतीवर होणार आहे. फलंदाजांसाठी ही खेळपट्टी अनुकूल असली, तरी वेगवान गोलंदाजांना येथे चांगली मदत मिळते.

Related posts