नागपूर/मुंबई (pragatbharat.com) : मध्य पूर्वेतील अमेरिका आणि इराण यांच्यात निर्माण झालेल्या वाढत्या तणावाचा व युद्धजन्य परिस्थितीचा जागतिक पुरवठा साखळीसह भारतीय व्यापारावर मोठा आर्थिक परिणाम होत आहे. धक्कादायक बाब म्हणजे, या जागतिक संकटाचा थेट फटका स्वतः केंद्रीय रस्ते वाहतूक आणि महामार्ग मंत्री नितीन गडकरी यांच्या कौटुंबिक व्यवसायालाही बसला आहे. युद्धामुळे गडकरी कुटुंबाचे शेकडो कमर्शियल कंटेनर वाटेतच अडकून पडल्याने त्यांना कोट्यवधी रुपयांचे मोठे आर्थिक नुकसान सहन करावे लागले आहे, असा खुलासा खुद्द नितीन गडकरी यांनी नागपूरमधील एका कार्यक्रमात केला.
डिटर्जंटचे १०० कंटेनर अडकले, पण स्थानिक बाजारपेठेचा घेतला आधार: नितीन गडकरी हे केवळ एक यशस्वी राजकारणी नसून एक प्रगतीशील उद्योजकही आहेत. त्यांच्या कौटुंबिक व्यवसायाबद्दल सांगताना ते म्हणाले, “आम्ही साखरेपासून डिटर्जंट बनवतो आणि माझी सून या व्यवसायाचे सर्व काम पाहते. आमच्या डिटर्जंटचे दर महिन्याला सुमारे १०० कंटेनर अमेरिकेला निर्यात केले जातात. मात्र, मध्य पूर्वेतील युद्ध सुरू होताच हा ट्रान्सपोर्ट पूर्णपणे बंद झाला आणि आंतरराष्ट्रीय धंदा ठप्प झाला.” परंतु, या संकटकाळात हार न मानता त्यांनी हा माल स्थानिक (लोकल) बाजारपेठेत पुरवण्यास सुरुवात केली आणि मोठ्या संघर्षातून व्यवसायाला सावरले.
केळी आणि सफरचंदांचे ४०० कंटेनर खराब; विमा कंपन्यांवर नाराजी: डिटर्जंट व्यवसायासोबतच नितीन गडकरी यांच्या मुलाच्या आंतरराष्ट्रीय कृषी व्यवसायालाही या युद्धाचा मोठा फटका बसला आहे. त्यांच्या मुलाचा इराणसोबत मोठा व्यापार असून याद्वारे भारतातून केळी इराणला निर्यात केली जातात, तर तिथून सफरचंद भारतात आयात होतात. युद्धामुळे केळ्यांनी भरलेले ४०० कंटेनर आणि इराणहून येणारे सफरचंदांचे २०० कंटेनर रस्त्यातच अडकले व त्यातील कोट्यवधींचा सर्व माल सडून खराब झाला. या मोठ्या नुकसानीनंतरही विमा कंपन्या (Insurance Companies) क्लेमचे पैसे देण्यास टाळाटाळ करत असल्याबद्दल गडकरींनी तीव्र नाराजी व्यक्त केली.
“चढ-उतार येतच असतात, आत्मनिर्भर व्हा” – गडकरींचा उद्योजकांना सल्ला: कौटुंबिक व्यवसायात कोट्यवधींचे नुकसान सोसावे लागल्यानंतरही नितीन गडकरी यांनी नवउद्योजकांचा उत्साह वाढवला. ते म्हणाले की, आव्हाने हा प्रत्येक व्यवसायाचा एक अविभाज्य भाग असतो. बिझनेसमध्ये अशा प्रकारचे चढ-उतार येतच असतात. त्यामुळे अशा संकटांना घाबरून जाण्याऐवजी सकारात्मक विचार ठेवून आणि अधिक आत्मनिर्भर होऊन पुढे गेले पाहिजे, असा मोलाचा सल्ला त्यांनी उद्योजकांना दिला.