मुंबई (pragatbharat.com) : सरकारी नोकरीच्या प्रतीक्षेत असलेल्या महाराष्ट्रातील सुशिक्षित बेरोजगार तरुण-तरुणींसाठी राज्य शासनाकडून एक अत्यंत दिलासादायक आणि मोठी बातमी समोर येत आहे. प्रशासकीय कारभाराला गती देण्यासाठी आणि विविध विभागांमधील मनुष्यबळाची कमतरता दूर करण्यासाठी राज्यात सुमारे १ लाख पदांची मेगा भरती (Mega Recruitment) राबवण्याचा महत्त्वाचा निर्णय घेण्यात आला आहे. मुख्यमंत्री कार्यालयाकडून या महाभरती प्रक्रियेचा आढावा घेऊन विविध विभागांना तात्काळ गतीने कार्यवाही करण्याचे निर्देश देण्यात आले आहेत.
या प्रमुख विभागांमध्ये होणार मोठी पदभरती: राज्य शासनाने जाहीर केलेल्या या मेगा भरती अंतर्गत प्रामुख्याने गृह विभाग, शालेय शिक्षण आणि महसूल विभागातील रिक्त पदे प्राधान्याने भरली जाणार आहेत. यामध्ये खालील पदांचा प्रामुख्याने समावेश असेल:
- पोलीस भरती (Police Bharti): कायदा व सुव्यवस्था अधिक मजबूत करण्यासाठी राज्यात सुमारे ४०,००0 पोलीस शिपाई व इतर पदांची भरती टप्प्याटप्प्याने केली जात आहे.
- शिक्षक भरती (Teacher Recruitment): राज्यातील शासकीय आणि जिल्हा परिषद शाळांमधील शिक्षकांची रिक्त पदे भरण्यासाठी पवित्र पोर्टलच्या माध्यमातून मोठी प्रक्रिया राबवली जाईल.
- तलाठी आणि महसूल विभाग (Talathi & Revenue Dept): ग्रामीण भागातील महसूल प्रशासन गतिमान करण्यासाठी नवीन जागांची भरती केली जाणार आहे.
- लिपिक आणि टंकलेखक: विविध मंत्रालयांतर्गत सुमारे २,१०० हून अधिक लिपिक संवर्गातील पदे भरली जाणार आहेत.
प्रशासकीय सुधारणा आणि अनुकंपा नियुक्ती: राज्य प्रशासनाने दिलेल्या माहितीनुसार, केवळ नवीन भरतीच नाही तर बऱ्याच काळापासून प्रलंबित असलेल्या अनुकंपा तत्त्वावरील नियुक्त्या देखील तातडीने मार्गी लावण्याचा निर्णय शासनाने घेतला आहे. यासाठी जुन्या जाचक सेवा प्रवेश नियमांमध्ये आवश्यक ते बदल करून ही प्रक्रिया अत्यंत सुटसुटीत आणि पारदर्शक करण्यात आली आहे. “शासकीय कर्मचाऱ्यांच्या कुटुंबाची काळजी घेणे हे सरकारचे कर्तव्य आहे,” या भावनेतून प्रलंबित अनुकंपा उमेदवारांना नोकरी देण्याची जबाबदारी प्रशासनाने स्वीकारली आहे.
भरतीचे स्वरूप आणि पारदर्शकता: ही संपूर्ण महाभरती TCS किंवा IBPS या नामांकित कंपन्यांच्या माध्यमातून तसेच लोकसेवा आयोगाच्या (MPSC) कक्षेतील पदे आयोगामार्फतच पारदर्शक पद्धतीने ऑनलाइन परीक्षेच्या माध्यमातून घेतली जाणार आहेत, जेणेकरून कोणत्याही प्रकारचा गैरप्रकार होणार नाही आणि गुणवंत विद्यार्थ्यांना न्याय मिळेल.
स्पर्धा परीक्षेची तयारी करणाऱ्या उमेदवारांनी आतापासूनच आपल्या अभ्यासाला गती द्यावी, असे आवाहन शिक्षण व गृह विभागाच्या वरिष्ठ अधिकाऱ्यांकडून करण्यात आले आहे.
