नवी मुंबई (pragatbharat.com) : ऐरोली परिसरात रस्त्याने जाणाऱ्या महिलांचा दुचाकीवरून पाठलाग करून विनयभंग करणाऱ्या एका २१ वर्षीय नराधमाला राबळे पोलिसांनी अत्यंत वेगाने तपास करत अटक केली आहे. सीसीटीव्ही फुटेज आणि तांत्रिक पुराव्यांच्या आधारे पोलिसांनी या विकृत आरोपीला बेड्या ठोकल्या असून, त्याने अशा अनेक घटनांची कबुली दिली आहे.
आरोपीची ओळख आणि घटना: कृष्णा महेंद्र कनोजिया (वय २१, रा. बद्रीभैया चाळ, गणपतीपाडा, कळवा पूर्व) असे अटक करण्यात आलेल्या आरोपीचे नाव आहे. २६ मे रोजी संध्याकाळी ४.३० वाजण्याच्या सुमारास ऐरोली येथील सेक्टर ६ मधील सेलिब्रेशन बिल्डिंगच्या पाठीमागील गेटजवळ एक २२ वर्षीय तरुणी तिच्या मैत्रिणीला भेटायला जात असताना ही घटना घडली. आरोपीने पांढऱ्या रंगाच्या ‘सुझुकी बर्गमन’ स्कुटरवरून तिचा पाठलाग केला आणि मागून येऊन अंगलट येण्याचा प्रयत्न करत विनयभंग केला व तिथून पळ काढला. या धक्क्यातून सावरत पीडित तरुणीने तात्काळ राबळे पोलीस ठाण्यात तक्रार दाखल केली.
तांत्रिक तपासाच्या जोरावर अटक: महिला सुरक्षेचा गंभीर विषय असल्याने वरिष्ठ पोलीस निरीक्षक बाळकृष्ण सावंत, पोलीस निरीक्षक (गुन्हे) सचिन गावळी आणि पोलीस निरीक्षक श्याम बनसोडे यांच्या मार्गदर्शनाखाली गुन्हे शोध पथकाने तात्काळ तपास सुरू केला. पोलिसांनी परिसरातील सीसीटीव्ही फुटेज तपासले आणि संशयित स्कुटरचा माग काढला. तांत्रिक विश्लेषणाच्या आधारे आरोपीचे लोकेशन शोधून पोलिसांनी कृष्णा कनोजिया याला कळवा परिसरातून ताब्यात घेतले आणि रीतसर अटक केली.
अनेक गुन्ह्यांची कबुली: पोलिसी खाक्या दाखवताच आरोपीने ऐरोली आणि आसपासच्या भागात अशाच प्रकारे इतर महिलांसोबतही गैरवर्तन केल्याची कबुली दिली आहे. सध्या त्याच्यावर भारतीय न्याय संहिता (BNS) च्या कलम ७४ आणि ७८ (महिलांच्या लज्जेला कृत्य करणे) अंतर्गत दोन स्वतंत्र गुन्हे दाखल करण्यात आले आहेत. नवी मुंबई आणि ठाणे परिसरात त्याने आणखी किती महिलांना अशा प्रकारे लक्ष्य केले आहे, याचा सविस्तर तपास पोलीस करत आहेत.
