पिंपरी-चिंचवड (pragatbharat.com) : पुणे आणि पिंपरी-चिंचवड परिसरात महिलांवरील अत्याचाराच्या घटना थांबण्याचे नाव घेत नाहीत. वाकड पोलीस ठाण्याच्या हद्दीत आज एक अंगावर काटा आणणारी घटना समोर आली आहे. एका पतीने आपल्या पत्नीला ऑफिसमधून बाहेर येताच बळजबरीने गाडीत फरफटत नेले आणि तिचे अपहरण केले. इतकेच नाही तर दोन दिवस तिला गाडीतच डांबून ठेवून वारंवार ‘भुलीचे इंजेक्शन’ (Anesthesia) दिल्याची धक्कादायक माहिती तपासात समोर आली आहे.
मिळालेली माहिती अशी की, पती सुमित आणि पत्नीमध्ये गेल्या काही दिवसांपासून कौटुंबिक वाद सुरू होते. पतीने संधी साधून पत्नीच्या ऑफिसचा पत्ता शोधला आणि १८ एप्रिल रोजी हा गुन्हा केला. शुद्धीवर आल्यानंतर पीडितेने एका मंदिरातून नागरिकांच्या मदतीने पोलिसांशी संपर्क साधला. वाकड पोलिसांनी तात्काळ कारवाई करत पती सुमितला अटक केली आहे. या घटनेमुळे शहरात खळबळ उडाली असून महिलांच्या सुरक्षेचा प्रश्न पुन्हा एकदा ऐरणीवर आला आहे.