जळगाव (pragatbharat.com) : जळगाव शहरात पैसे दुप्पट नव्हे, तर चक्क पाचपट करून देण्याचे आमिष दाखवून एका धान्य व्यापाऱ्याला ५ लाख २० हजार रुपयांना गंडा घातल्याचा प्रकार उघडकीस आला आहे. या प्रकरणी शनिपेठ पोलीस ठाण्यात पाच जणांविरुद्ध गुन्हा दाखल करण्यात आला असून, धक्कादायक बाब म्हणजे अटकेत असलेल्या तीन आरोपींपैकी एक वाशिम पोलीस दलातील कर्मचारी असल्याची माहिती समोर आली आहे.
नेमकी घटना काय? धान्य खरेदी-विक्रीचा व्यवसाय करणारे ५८ वर्षीय व्यापारी जगदीश शंकर व्यास यांची आरोपींशी ओळख झाली होती. आरोपींनी त्यांना ‘एक लाख रुपयांचे पाच लाख रुपये’ करून देण्याचे आमिष दाखवले. या आमिषाला बळी पडून व्यास यांनी ५ लाख २० हजार रुपये आरोपींच्या स्वाधीन केले. मात्र, पैसे दिल्यानंतर आरोपींनी परतावा न देता त्यांची फसवणूक केली. आपली फसवणूक झाल्याचे लक्षात येताच व्यास यांनी शनिपेठ पोलीस ठाण्यात धाव घेतली.
पोलीस कर्मचाऱ्याचा सहभाग: तक्रार प्राप्त होताच पोलिसांनी तपासाची चक्रे फिरवून तिघांना बेड्या ठोकल्या आहेत. अटकेतील आरोपींमध्ये वाशिम पोलीस दलात कार्यरत असलेल्या एका पोलीस अंमलदाराचा समावेश असल्याने पोलीस वर्तुळात मोठी खळबळ उडाली आहे. रक्षकच भक्षक बनल्याच्या या प्रकारामुळे संताप व्यक्त होत आहे. पोलिसांनी पाच जणांविरुद्ध गुन्हा नोंदवला असून फरार असलेल्या इतर दोन आरोपींचा शोध युद्धपातळीवर सुरू आहे. व्यापाऱ्यांनी अशा प्रकारच्या कोणत्याही अमिषाला बळी पडू नये, असे आवाहन पोलीस प्रशासनाकडून करण्यात आले आहे.