नवी दिल्ली (pragatbharat.com) : देशातील जैवइंधनाचा (Biofuel) वापर वाढवण्यासाठी आणि कार्बन उत्सर्जन कमी करण्यासाठी केंद्र सरकारने केंद्रीय मोटार वाहन नियम, १९८९ (CMVR) मध्ये महत्त्वपूर्ण सुधारणा सुचवणारी एक मसुदा अधिसूचना (Draft Notification) जारी केली आहे. या नव्या नियमांमुळे भारतात १००% इथेनॉल (E100) आणि १००% बायोडीझेलवर (B100) चालणाऱ्या वाहनांचा मार्ग मोकळा होणार असून, इंधन वर्गीकरणाच्या तांत्रिक मानकांमध्ये मोठे बदल करण्यात आले आहेत.
अधिसूचनेतील प्रमुख तरतुदी:
- इंधन वर्गीकरण: हायड्रोजन इंधनाचे तांत्रिक वर्गीकरण आता ‘Hydrogen + CN’ वरून सुधारून ‘Hydrogen + CNG’ असे करण्यात आले आहे.
- वजन मर्यादेत वाढ: निवडक श्रेणीतील वाहनांसाठी ‘एकूण वाहन वजन’ (Gross Vehicle Weight) मर्यादा ३,००० किलोवरून ३,५०० किलो पर्यंत वाढवण्याचा प्रस्ताव आहे. यामुळे E20 इंधनावर चालणाऱ्या मोठ्या वाहनांना चालना मिळणार आहे.
- बायोडीझेल झेप: बायोडीझेलच्या वापराचे संदर्भ आता B10 (१०% मिश्रण) वरून थेट B100 (१००% बायोडीझेल) पर्यंत अपग्रेड करण्यात आले आहेत.
- उत्सर्जन चाचणी: इंधन वर्गीकरण आणि इथेनॉल मिश्रणाचे उद्दिष्ट साध्य करण्यासाठी उत्सर्जन चाचणी (Emission Testing) आणि तांत्रिक टिपण्यांचे प्रमाणीकरण (Standardisation) करण्यात आले आहे.
या बदलांमुळे वाहन निर्मिती क्षेत्राला आता अधिक क्षमतेची आणि पर्यायी इंधनावर चालणारी इंजिने तयार करणे सोपे होणार आहे. या मसुद्यावर पुढील ३० दिवसांपर्यंत सर्वसामान्य नागरिक आणि उद्योगांकडून हरकती व सूचना मागवण्यात आल्या आहेत, त्यानंतर अंतिम निर्णय घेतला जाईल.