वॉशिंग्टन (pragatbharat.com) : वाढती महागाई आणि जागतिक स्तरावरील आर्थिक तणावाच्या पार्श्वभूमीवर, अमेरिकेची मध्यवर्ती बँक असलेल्या फेडरल रिझर्व्हने सलग तिसऱ्या बैठकीत व्याजदर स्थिर ठेवण्याचा निर्णय घेतला आहे. ‘फेडरल ओपन मार्केट कमिटी’ने (FOMC) दिलेल्या माहितीनुसार, बेंचमार्क फंड रेट ३.५% ते ३.७५% या मर्यादेत कायम ठेवण्यात आले आहेत.
फेडरल रिझर्व्हचे अध्यक्ष जेरोम पॉवेल यांच्या अध्यक्षतेखाली झालेली ही कदाचित शेवटची महत्त्वाची बैठक मानली जात आहे. मध्यपूर्वेतील वाढता तणाव आणि जागतिक स्तरावर वाढलेले इंधन दर यामुळे महागाईचा दर अपेक्षेपेक्षा जास्त आहे, ज्याचा परिणाम आर्थिक स्थिरतेवर होत असल्याचे बँकेने नमूद केले आहे. राष्ट्राध्यक्ष डोनाल्ड ट्रम्प यांनी वारंवार व्याजदर कमी करण्याची मागणी केली असली, तरी महागाईवर नियंत्रण मिळवण्यासाठी फेडरल रिझर्व्हने सध्यातरी दरांमध्ये कोणताही बदल केलेला नाही.
दरम्यान, पॉवेल यांनी स्पष्ट केले की, त्यांचा अध्यक्षपदाचा कार्यकाळ १५ मे २०२६ रोजी संपत असला, तरी ते ‘बोर्ड ऑफ गवर्नर्स’वर २०२८ पर्यंत राहू शकतात. फेडरल रिझर्व्हच्या नूतनीकरण प्रक्रियेतील पारदर्शकतेबाबत सुरू असलेल्या चौकशीची पूर्ण होईपर्यंत आपण या पदावर राहू इच्छितो, असे त्यांनी संकेत दिले आहेत. पॉवेल यांच्यानंतर केविन वॉर्श हे फेडरल रिझर्व्हची धुरा सांभाळणार असून, त्यांच्या नावाला सिनेट समितीने मंजुरी दिली आहे.