मावळ (pragatbharat.com) : पुणे जिल्ह्यातील मावळ तालुक्यातील नवलाख उंब्रे एमआयडीसी परिसरातील जाधववाडी धरणात एक अत्यंत हृदयद्रावक घटना घडली आहे. दुपारी पोहण्यासाठी गेलेल्या सहा मित्रांपैकी तिघांचा पाण्यात बुडून दुर्दैवी मृत्यू झाला आहे. पाण्याचा अंदाज न आल्याने ही दुर्घटना घडल्याचे प्राथमिक माहितीवरून समोर येत आहे.
नेमकी घटना काय? मिळालेल्या माहितीनुसार, उन्हाळ्याच्या सुट्ट्यांमुळे नवलाख उंब्रे परिसरात सहा मित्र फिरण्यासाठी आले होते. दुपारच्या कडक उन्हामुळे त्यांनी जाधववाडी धरणात पोहण्याचा आनंद घेण्याचे ठरवले. मात्र, धरणातील पाण्याच्या खोलीचा आणि गाळाचा अंदाज न आल्याने सहापैकी तिघे जण गटांगळ्या खाऊ लागले. उर्वरित तिघांनी मदतीसाठी आरडाओरडा केला असता, जवळच असलेल्या स्थानिकांनी तातडीने धाव घेऊन तिघांना सुखरूप बाहेर काढले. मात्र, दुर्दैवाने इतर तिघे जण खोल पाण्यात ओढले गेले.
बचावकार्यानंतर मृतदेह बाहेर काढले घटनेची माहिती मिळताच वन्यजीव रक्षक मावळ संस्था, शिवदुर्ग मित्र लोणावळा, NDRF आणि तळेगाव दाभाडे अग्निशामक दलाचे जवान तातडीने घटनास्थळी दाखल झाले. त्यांनी शोधमोहीम राबवून तिघांना पाण्याबाहेर काढले. त्यांना तातडीने तळेगाव दाभाडे येथील जनरल हॉस्पिटलमध्ये दाखल करण्यात आले, मात्र डॉक्टरांनी त्यांना तपासून मृत घोषित केले.
मृतांची नावे: या भीषण दुर्घटनेत मृत्युमुखी पडलेल्यांची नावे खालीलप्रमाणे आहेत: १. अजय गारुडे २. अनिकेत पवार ३. संतोष एडके
प्रगत भारत आवाहन: उन्हाळ्याच्या दिवसांत धरणांमध्ये, नद्यांमध्ये किंवा तलावांमध्ये पोहण्यासाठी जाण्याचे प्रमाण वाढते. मात्र, अनोळखी पाण्याच्या ठिकाणी खोलवर जाणे जीवावर बेतू शकते. नागरिकांनी पोहताना आवश्यक ती खबरदारी घ्यावी आणि प्रशासनाने दिलेल्या सूचनांचे पालन करावे, असे आवाहन ‘प्रगत भारत’ प्रशासनातर्फे करण्यात येत आहे.
