पिंपरी-चिंचवड (pragatbharat.com) : भाजप कार्यकर्ते रमेश रेड्डी यांच्या निर्घृण हत्याकांडाने संपूर्ण शहर हादरले असतानाच, या प्रकरणातील मुख्य आरोपी आफताब समीर शेख याने पोलिसांच्या भीतीपोटी न्यायालयात आत्मसमर्पण केले आहे. पिंपरी-चिंचवड पोलिसांकडून संभाव्य एन्काउंटर होण्याची भीती वाटत असल्याचा खळबळजनक दावा त्याने आपल्या निवेदनात केला आहे.
२१ गोळ्या झाडून केला होता खून: गेल्या वर्षी रमेश यांचे भाऊ विक्रम यांची हत्या झाली होती. या गुन्ह्यातील आरोपींचा जामीन होऊ नये म्हणून रमेश रेड्डी कायदेशीर लढा देत होते. याचाच राग मनात धरून आरोपींनी एका कापड दुकानात रमेश यांच्यावर हल्ला केला. हल्लेखोरांनी त्यांच्यावर तब्बल २१ गोळ्या झाडल्या, ज्यातील ९ गोळ्या त्यांच्या शरीरात शिरल्या होत्या. मृत्यूची खात्री करण्यासाठी आरोपींनी त्यांच्या डोक्यावर कोयत्याने वार करून अत्यंत क्रूरपणे त्यांची हत्या केली होती.
एन्काउंटरच्या भीतीने न्यायालयात धाव: या गुन्ह्यातील इतर पाच आरोपींना पोलिसांनी यापूर्वीच बेड्या ठोकल्या होत्या, मात्र आफताब शेख फरार होता. “मला दिसताच क्षणी गोळ्या घालण्याचे आदेश पोलिसांना आहेत,” अशी माहिती मिळाल्याचा दावा करत आफताबने वडगाव मावळ न्यायालयात आत्मसमर्पण केले. पोलिसांकडून आपल्या जीवाला धोका असल्याचे सांगत त्याने थेट न्यायालयीन कोठडीत रवानगी करण्याची विनंती न्यायालयाला केली आहे.
कायदेशीर कारवाई सुरू: या निर्घृण हत्याकांडातील मुख्य सूत्रधार शरण आल्याने आता पोलीस तपासाला नवी दिशा मिळणार आहे. रेड्डी कुटुंबाने यापूर्वीच आरोपींना कठोर शिक्षा करण्याची मागणी केली आहे. पिंपरी-चिंचवड पोलिसांनी या प्रकरणातील तपासाची व्याप्ती वाढवली असून, आफताबच्या दाव्यांनंतर आता पोलीस कोणती कायदेशीर भूमिका घेतात, याकडे सर्वांचे लक्ष लागले आहे.