मुंबई (pragatbharat.com) : मुंबई विमानतळावर कस्टम विभागाने मोठी कारवाई करत दुबईहून आलेल्या दोन प्रवाशांकडून सुमारे २.२ किलो सोने जप्त केले आहे. आंतरराष्ट्रीय बाजारात या सोन्याची किंमत ३ कोटी रुपयांहून अधिक आहे. ९ आणि १० मे रोजी केलेल्या दोन वेगवेगळ्या कारवायांमध्ये ही जप्ती करण्यात आली असून दोन्ही आरोपींना अटक करण्यात आली आहे.
पहिल्या घटनेत, गुप्त माहितीच्या आधारे एका प्रवाशाची झडती घेतली असता, त्याने सिगारेटच्या पाकिटात अत्यंत हुशारीने लपवलेली २४ कॅरेट सोन्याची धूळ (Gold Dust) सापडली. मेणाच्या मिश्रणात लपवलेल्या या सोन्याचे निव्वळ वजन १०२० ग्रॅम असून त्याची किंमत १.४१ कोटी रुपये आहे. दुसऱ्या घटनेत, वित्त क्षेत्रात काम करणाऱ्या एका प्रोफेशनला अटक करण्यात आली असून, त्याच्याकडून १.२५७ किलो कच्चे सोने (Crude Gold) जप्त करण्यात आले आहे, ज्याची किंमत १.७४ कोटी रुपये आहे.
चौकशी दरम्यान या आरोपीने धक्कादायक खुलासा केला. त्याने सांगितले की, ‘अमेरिका-इराण संघर्ष’ आणि दुबई परिसरात अलीकडेच झालेल्या हल्ल्यांच्या भीतीमुळे तो आपली मालमत्ता सोन्याच्या स्वरूपात भारतात हलवत होता. कस्टम ड्युटी वाचवण्यासाठी त्याने ही तस्करी केल्याचे कबूल केले. “जागतिक अस्थिरतेचे कारण देऊन कायद्याचे उल्लंघन केल्यास गंभीर परिणाम भोगावे लागतील,” असा इशारा कस्टम विभागाने दिला आहे.