मुंबई (pragatbharat.com) : राज्याच्या राजकारणात सध्या मोठ्या घडामोडी घडत असून राष्ट्रवादी काँग्रेस (अजित पवार गट) ला ठाण्यात मोठे भगदाड पडले आहे. पक्षाचे मुख्य प्रवक्ते आणि माजी खासदार आनंद परांजपे यांनी आज राष्ट्रवादीचा हात सोडून मुख्यमंत्री एकनाथ शिंदे यांच्या नेतृत्वाखालील शिवसेनेत अधिकृत प्रवेश केला आहे. विधानसभा आणि स्थानिक स्वराज्य संस्थांच्या निवडणुकीनंतरही शिंदे गटातील ‘इनकमिंग’ सुरूच असल्याने राजकीय वर्तुळात चर्चांना उधाण आले आहे.
आनंद परांजपे यांचा ‘स्वगृही’ परतण्याचा निर्णय: आनंद परांजपे यांनी आज सकाळीच राष्ट्रवादी काँग्रेसमधील आपल्या सर्व पदांचा राजीनामा दिला होता. त्यानंतर खासदार श्रीकांत शिंदे आणि राज्याचे मंत्री दादा भुसे यांच्या उपस्थितीत त्यांनी भगवा हाती धरला. यावेळी बोलताना दादा भुसे म्हणाले की, “परांजपे आज खऱ्या अर्थाने स्वगृही परतले आहेत. त्यांचा राजकीय प्रवास शिवसेनेतच सुरू झाला होता, आता मुख्यमंत्री एकनाथ शिंदेंच्या कामावर विश्वास ठेवून त्यांनी हा निर्णय घेतला आहे.”
प्रवेशामागचे मुख्य कारण: मिळालेल्या माहितीनुसार, आनंद परांजपे हे विधान परिषदेच्या उमेदवारीसाठी इच्छुक होते. मात्र, पक्षात संधी न मिळाल्याने ते गेल्या काही दिवसांपासून नाराज होते. अखेर ही नाराजी पक्षप्रवेशात रूपांतरित झाली आहे. ठाणे आणि परिसरातील राष्ट्रवादीची ताकद टिकवून ठेवण्याचे मोठे आव्हान आता अजित पवार यांच्यासमोर उभे ठाकले आहे. परांजपे यांना आगामी काळात शिवसेनेत एखादी मोठी जबाबदारी किंवा पद मिळण्याची दाट शक्यता वर्तवली जात आहे.