किंशासा/नवी दिल्ली (pragatbharat.com) : जग अजूनही हंताव्हायरसच्या (Hantavirus) संकटाशी सामना करत असतानाच, आता ‘इबोला’ (Ebola Virus) या अत्यंत जीवघेण्या आणि भयंकर व्हायरसने आफ्रिकेत पुन्हा एकदा हाहाकार माजवला आहे. आफ्रिकेची सर्वोच्च सार्वजनिक आरोग्य संस्था ‘आफ्रिका सीडीसी’ने (Africa CDC) काँगोच्या इतुरी प्रांतात इबोलाच्या नव्या उद्रेकाची पुष्टी केली आहे. या नव्या साथीमध्ये आतापर्यंत २४६ पेक्षा जास्त संशयित रुग्ण आढळले असून तब्बल ८० जणांचा मृत्यू झाला आहे. या भीषण परिस्थितीमुळे जागतिक आरोग्य संघटना (WHO) सतर्क झाली असून आंतरराष्ट्रीय पातळीवर ‘ग्लोबल हेल्थ एमर्जन्सी’ (जागतिक आरोग्य आणीबाणी) जाहीर करण्यात आली आहे.
लॅब चाचणीत पुष्टी; मोंगवालू आणि रवामपारामध्ये सर्वाधिक संसर्ग: आरोग्य अधिकाऱ्यांनी दिलेल्या माहितीनुसार, मोंगवालू आणि रवामपारा या आरोग्य क्षेत्रांमध्ये सर्वाधिक रुग्णांची नोंद झाली आहे. यातील चार प्रकरणांची प्रयोगशाळेत अधिकृत पुष्टी झाली आहे. जागतिक आरोग्य संघटनेचे प्रमुख टेड्रोस अधानोम गेब्रेयसस यांनी सांगितले की, प्राथमिक चाचणीत संसर्ग स्पष्ट झाला नव्हता, मात्र डब्लूएचओच्या (WHO) विशेष पथकाने काँगोमध्ये जाऊन नमुने गोळा केल्यानंतर या घातक विषाणूच्या अस्तित्वावर शिक्कामोर्तब झाले.
इबोला किती धोकादायक? इबोला हा अत्यंत वेगाने पसरणारा संसर्गजन्य आजार आहे. संक्रमित व्यक्तीचे रक्त, उलटी, वीर्य आणि इतर शारीरिक द्रव्यांच्या (Body Fluids) थेट संपर्कात आल्यास याचा प्रसार होतो. डब्ल्यूएचओच्या माहितीनुसार, हा आजार इबोला विषाणू, सुदान विषाणू आणि बुंदीबुग्यो अशा विविध प्रकारच्या विषाणूंमुळे होतो. काँगोला यापूर्वी इबोलाचा अनुभव असला, तरी प्राथमिक तपासणीनुसार हा प्रकार काहीसा वेगळा आणि अधिक आव्हानात्मक असल्याचे शास्त्रज्ञांचे म्हणणे आहे.
इतर देशांमध्ये संसर्ग पसरण्याचा तीव्र धोका: इबोलाचा प्रादुर्भाव झालेला हा क्षेत्र युगांडा आणि दक्षिण सुदानच्या सीमेजवळ आहे. शेजारील युगांडाची राजधानी कम्पाला येथील रुग्णालयात एका काँगोच्या नागरिकाचा बुंदीबुग्यो विषाणूमुळे मृत्यू झाला असून, त्याच्या संपर्कात आलेल्या सर्वांना विलगीकरणात (Quarantine) ठेवण्यात आले आहे. मोंगवालू परिसरातील सोन्याच्या खाणी आणि लोकांच्या सततच्या स्थलांतरामुळे, तसेच खराब रस्ते आणि मर्यादित आरोग्य सुविधांमुळे हा संसर्ग शेजारील देशांमध्ये पसरण्याचा धोका वाढला आहे. परिस्थिती आटोक्यात आणण्यासाठी काँगो, युगांडा आणि दक्षिण सुदानच्या आरोग्य अधिकाऱ्यांची संयुक्त राष्ट्रांच्या संस्थांसोबत तातडीची बैठक बोलावण्यात आली आहे.