नागपूर (pragatbharat.com) : सध्याची आंतरराष्ट्रीय आर्थिक परिस्थिती पाहता भारतामध्ये उत्पादन आणि लॉजिस्टिक्स क्षेत्रात प्रचंड मोठ्या प्रमाणावर संधी निर्माण होत आहेत. मात्र, जागतिक पुरवठा साखळीचा (Global Supply Chain) प्रभावी भाग बनायचे असेल, तर आपल्याला आंतरराष्ट्रीय स्तरावर स्पर्धात्मक व्हावे लागेल. लॉजिस्टिक्सवर होणारा अतिरिक्त खर्च कमी करणे हेच सध्या उत्पादन क्षेत्रापुढील सर्वात मोठे आव्हान आहे, असे प्रतिपादन महाराष्ट्राचे मुख्यमंत्री देवेंद्र फडणवीस यांनी आज येथे केले.
गोंडखैरी येथे गोदाम लॉजिस्टिक्स प्रायव्हेट लिमिटेडच्या वतीने उभारण्यात आलेल्या अत्याधुनिक गोदाम लॉजिस्टिक्स पार्कचे भव्य उद्घाटन मुख्यमंत्री देवेंद्र फडणवीस यांच्या हस्ते संपन्न झाले, याप्रसंगी ते बोलत होते. या कार्यक्रमाला केंद्रीय रस्ते परिवहन आणि महामार्ग मंत्री नितीन गडकरी यांची प्रमुख उपस्थिती होती. याशिवाय आमदार डॉ. आशिष देशमुख, परिणय फुके, गोदाम लॉजिस्टिक्सचे संचालक महावीर जैन, के. के. गुप्ता, राजन अग्रवाल, जयप्रकाश गुप्ता, कृष्णकुमार गुप्ता आणि हल्दीरामचे शिवकिसन अग्रवाल आदी मान्यवर उपस्थित होते.
नागपूर आणि गडचिरोली औद्योगिक विकासाचे केंद्र: मुख्यमंत्री पुढे म्हणाले की, नागपूर व गडचिरोली भागात आता उद्योग मोठ्या प्रमाणात आकर्षित होत आहेत. या क्षेत्रामुळे विदर्भासह संपूर्ण राज्याच्या औद्योगिक प्रगतीला गती मिळेल. गोंडखैरी येथील हा प्रकल्प नागपूरच्या आर्थिक विकासाच्या दृष्टीने मैलाचा दगड ठरेल, असा विश्वास त्यांनी व्यक्त केला.
इलेक्ट्रिक वाहनांमुळे वाहतूक खर्च कमी होणार – केंद्रीय मंत्री नितीन गडकरी: कार्यक्रमात बोलताना केंद्रीय मंत्री नितीन गडकरी यांनी मालवाहतुकीमध्ये इलेक्ट्रिक वाहनांच्या (EV) वापराचा आग्रह धरला. ते म्हणाले की, “लॉजिस्टिक्स क्षेत्रातील इंधन खर्च कमी करण्यासाठी इलेक्ट्रिक वाहनांचा मोठ्या प्रमाणावर वापर करणे गरजेचे आहे. यामुळे इंधनाची बचत तर होईलच, शिवाय पर्यावरणाचे रक्षण होऊन वाहतुकीचा खर्चही लक्षणीयरीत्या कमी करता येईल.”
असा आहे अत्याधुनिक ‘गोदाम लॉजिस्टिक्स पार्क’: मध्य भारतातील सर्वात मोठ्या एकात्मिक औद्योगिक लॉजिस्टिक्स पार्क्सपैकी एक असलेल्या या प्रकल्पाची वैशिष्ट्ये खालीलप्रमाणे आहेत:
- विशाल विस्तार: हा प्रकल्प तब्बल १०५ एकर जागेत पसरलेला असून, यात २५ लाख चौरस फुटांची दर्जेदार ‘वर्ग अ’ (Class A) गोदाम क्षमता आहे.
- अत्याधुनिक तंत्रज्ञान: या पार्कमध्ये कृत्रिम बुद्धिमत्तेद्वारे (AI Driven) संचालित स्मार्ट वेअरहाऊसिंगची अत्याधुनिक सुविधा उपलब्ध आहे.
- मोठी गुंतवणूक: या प्रकल्पासाठी सुमारे ६०० कोटी रुपयांची गुंतवणूक करण्यात आली असून, पर्यावरपूरक कामांसाठी यात सौर ऊर्जा संयंत्राचा (Solar Power Plant) समावेश करण्यात आला आहे.
- धोरणात्मक जोडणी: हा पार्क राष्ट्रीय महामार्ग क्र. ४४ (NH-44) आणि हिंदुहृदयसम्राट बाळासाहेब ठाकरे महाराष्ट्र समृद्धी महामार्गाशी थेट जोडलेला असल्याने वाहतूक अत्यंत वेगवान होणार आहे.
- बंपर रोजगार निर्मिती: या महत्त्वाकांक्षी प्रकल्पाच्या माध्यमातून क्षेत्रात प्रत्यक्ष आणि अप्रत्यक्ष रूपात सुमारे १५ हजार रोजगाराच्या संधी उपलब्ध होणार आहेत.
कार्यक्रमाच्या सुरुवातीला संचालक महावीर जैन यांनी प्रास्ताविकातून प्रकल्पाची माहिती दिली, तर राजन अग्रवाल यांनी उपस्थितांचे आभार मानले. विदर्भाच्या औद्योगिक आणि आर्थिक विकासाला नवी दिशा देणारा हा प्रकल्प ठरत आहे.
