मुंबई (pragatbharat.com) : महाराष्ट्रात गुंतवणूक आणि तरुण पिढीसाठी रोजगार निर्मितीला मोठी चालना देणारी एक अत्यंत आनंदाची बातमी समोर आली आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या उद्योग विभाग मंत्रिमंडळ उपसमितीच्या बैठकीत तब्बल ८९ हजार ७३१ कोटी रुपयांच्या पाच विशाल आणि अतिविशाल (Mega & Ultra-Mega) प्रकल्पांना विशेष प्रोत्साहन देण्याचा ऐतिहासिक निर्णय घेण्यात आला आहे. या महागुंतवणुकीमुळे राज्यात सुमारे २० हजार प्रत्यक्ष आणि अप्रत्यक्ष रोजगार निर्माण होणार आहेत.
हे भव्य प्रकल्प विदर्भ, मराठवाडा आणि नाशिकसह राज्याच्या विविध भागांमध्ये उभारले जाणार असून, यामुळे प्रादेशिक औद्योगिक विकासाचा समतोल राखण्यास मोठी मदत होणार आहे. कोळशापासून वायू ऊर्जा निर्मिती, सोलर सेल मॉड्युलर, वेफर्स पॅनेल आणि इलेक्ट्रिक स्टील अशा अत्याधुनिक व हरित ऊर्जा क्षेत्राशी संबंधित उद्योगांचा यात समावेश आहे.
कोणती कंपनी कुठे आणि किती गुंतवणूक करणार?
- अदानी एंटरप्रायझेस (Adani Enterprises): नागपूर जिल्ह्यातील लिंगा कळमेश्वर येथे ७०,००० कोटी रुपयांची भव्य गुंतवणूक करून ‘कोल मायनिंग आणि गॅसिफिकेशन’ प्रकल्प उभारणार आहे. या एकाच प्रकल्पातून १०,००० नोकऱ्या उपलब्ध होणार आहेत.
- मे. अक्षत ग्रीनटेक लि. (Akshat Greentech): छत्रपती संभाजीनगर (औरंगाबाद) येथे १२,५०० कोटी रुपयांची गुंतवणूक करून ‘सोलर सेल मॉड्युल’ उत्पादन प्रकल्प सुरू करणार आहे. यामुळे ४,००० रोजगार निर्माण होतील.
- गॅफाइट कंपनी (Graphite Company): नाशिकमध्ये ४,६५१ कोटी रुपयांची गुंतवणूक करणार असून, त्याद्वारे १,०६६ रोजगारांची निर्मिती अपेक्षित आहे.
- एचएस ह्युसंग इंडिया (HS Hyosung India): नागपुरात १,७४० कोटी रुपयांची गुंतवणूक करणार असून ४०० लोकांना रोजगार मिळणार आहे.
- मे. एनएलएमके इंडिया कोटिंग (NLMK India): छत्रपती संभाजीनगर येथे ८४० कोटी रुपयांची गुंतवणूक करणार असून १५३ रोजगार निर्माण होणार आहेत.
तरुणांसाठी कौशल्य विकासाच्या संधी: राज्याच्या औद्योगिक धोरणानुसार सामूहिक प्रोत्साहन योजनेअंतर्गत या कंपन्यांना विशेष सवलती दिल्या गेल्या आहेत. थेट रोजगाराव्यतिरिक्त, या प्रकल्पांमुळे पुरवठा साखळी, लॉजिस्टिक्स आणि स्थानिक लघु उद्योगांना (MSME) मोठा फायदा होणार आहे. विशेषतः उच्च-तंत्रज्ञान (High-Tech) क्षेत्रांमध्ये प्रशिक्षण आणि कौशल्य विकासाच्या संधी वाढणार असल्याने महाराष्ट्रातील तरुणांची रोजगारक्षमता अधिक सुधारणार असल्याचे मुख्यमंत्र्यांनी सांगितले.
