जिनेव्हा / किन्शासा (pragatbharat.com) : आफ्रिकन देश असलेल्या डेमोक्रॅटिक रिपब्लिक ऑफ काँगो (DRC) मध्ये इबोला (Ebola) विषाणूच्या संसर्गाने पुन्हा एकदा डोके वर काढले असून परिस्थिती चिंताजनक बनत आहे. जागतिक आरोग्य संघटनेने (WHO) दिलेल्या अधिकृत माहितीनुसार, काँगोमध्ये आतापर्यंत इबोलाचे तब्बल ९०६ संशयित रुग्ण आढळले आहेत. यामध्ये २२३ संशयित मृत्यूंचा समावेश असून, या मृत्यूंची आरोग्य यंत्रणेमार्फत सखोल चौकशी आणि तपासणी केली जात आहे. काँगोपाठोपाठ आता शेजारील देश युगांडामध्येही इबोलाचे रुग्ण आढळल्याने जागतिक आरोग्य यंत्रणा सतर्क झाली आहे.
‘बुंदिबुग्यो’ स्ट्रेनचा धोका आणि सद्यस्थिती: ‘डब्ल्यूएचओ’ने स्पष्ट केले आहे की, सध्या काँगो आणि युगांडामध्ये इबोलाच्या ‘बुंदिबुग्यो’ (Bundibugyo strain) या अत्यंत घातक स्ट्रेनचा प्रादुर्भाव सुरू आहे. काँगोमधील इतुरी, उत्तर किवू आणि दक्षिण किवू या प्रांतांमध्ये आतापर्यंत १२५ रुग्णांना इबोलाची अधिकृत लागण झाल्याची पुष्टी झाली असून, १७ जणांचा निश्चित मृत्यू झाला आहे. दुसरीकडे, युगांडात इबोलाचे ७Confirmed रुग्ण आढळले असून एका व्यक्तीचा मृत्यू झाला आहे. मात्र, दिलासादायक बाब म्हणजे अद्याप दोन्ही देशांमध्ये कोणताही सामूहिक संसर्ग (Community Transmission) झालेला नसल्याचे अहवालात म्हटले आहे.
लस किंवा उपचारांचा अभाव; चिंता वाढली: पूर्व काँगोमध्ये हा इबोलाचा उद्रेक साधारणपणे दोन महिन्यांपूर्वी सुरू झाल्याचा अंदाज तज्ज्ञांनी व्यक्त केला आहे. सर्वात मोठी चिंतेची बाब म्हणजे, इबोलाच्या या ‘बुंदिबुग्यो’ स्ट्रेनवर मात करण्यासाठी सध्या कोणतीही मान्यताप्राप्त लस (Vaccine) किंवा विशेष वैद्यकीय उपचार पद्धती (Therapies) उपलब्ध नाही. त्यामुळे या संसर्गाचा प्रसार रोखणे हे आरोग्य यंत्रणेसमोरील मोठे आव्हान बनले आहे.
जागतिक स्तरावर देखरेख: इबोलाचा हा प्रादुर्भाव रोखण्यासाठी जागतिक आरोग्य संघटना स्थानिक सरकारांच्या मदतीने बाधित भागात वैद्यकीय पथके आणि तातडीची मदत पाठवत आहे. आंतरराष्ट्रीय प्रवाशांच्या माध्यमातून हा संसर्ग इतर देशांमध्ये पसरू नये, यासाठी विमानतळांवर आणि सीमांवर देखरेख वाढवण्याच्या सूचनाही देण्यात आल्या आहेत.
