मुंबई (pragatbharat.com) : ‘अप्पी आमची कलेक्टर’ या लोकप्रिय मालिकेत ‘अर्जुन’ ही मुख्य भूमिका साकारून महाराष्ट्रातील घराघरांमध्ये पोहोचलेला अभिनेता रोहित परशुराम (Rohit Parshuram) आता पुन्हा एकदा एका नव्या रुपात प्रेक्षकांच्या भेटीस येत आहे. झी मराठी वाहिनीवरील ‘कृष्णाईच्या लेकी’ या आगामी नवीन मालिकेत तो ‘शंकर’ हे दमदार आणि भावनिक पात्र साकारणार आहे. या नव्या मालिकेच्या निमित्ताने रोहितने आपल्या ऑडिशनचा किस्सा आणि दिग्गज अभिनेत्री निवेदिता सराफ यांच्यासोबत काम करण्याच्या अनुभवाबद्दल मनातील भावना उघड केल्या आहेत.
निवेदिता सराफ यांचं नाव समजताच थेट मंदिरात धाव: रोहित परशुरामने सांगितले की, जेव्हा त्याला समजले की या मालिकेत ज्येष्ठ अभिनेत्री निवेदिता सराफ (Nivedita Saraf) मुख्य भूमिकेत आहेत, तेव्हा तो कमालीचा भावुक झाला होता. “ज्या दिवशी मला समजलं की निवेदिता ताई या मालिकेत आहेत, त्या दिवशी मी अक्षरशः मारुतीरायाकडे (हनुमान) प्रार्थना करायला सुरुवात केली की मला ही मालिका मिळू दे. गेली चाळीस वर्षे त्यांच्या अभिनयाने आणि गोड हास्याने महाराष्ट्राला भुरळ घातली आहे. त्यांच्या प्रोजेक्टमध्ये केवळ हातात भाला घेऊन उभे राहण्याची संधी मिळाली असती, तरी माझे सार्थक झाले असते; इथे तर मी मुख्य नायक साकारतोय,” अशा शब्दांत रोहितने आपल्या भावना व्यक्त केल्या.
कसा मिळाला ‘शंकर’चा रोल? आपल्या ऑडिशनचा रंजक किस्सा सांगताना रोहित म्हणाला की, तो ‘कमळी’ मालिकेच्या सेटवर आपल्या मित्राला सहज भेटायला गेला होता. तिथे दिग्दर्शक अनिकेत साने यांच्या नवीन मालिकेच्या ऑडिशन्स सुरू असल्याचे समजले. रोहितने तिथेच तातडीने ऑडिशन दिली. बरेच राऊंड्स आणि सीन वर्क झाल्यानंतर झी मराठीने त्याला ‘शंकर’ या पात्रासाठी निवडले. शंकर हे पात्र कोल्हापुरातील एका सावकार मातोश्रींचा रांगडा मुलगा आहे, ज्याला व्यायामाची प्रचंड आवड आहे. हा लहेजा अचूक पकडण्यासाठी रोहित सध्या कोल्हापुरी भाषा, तिचा लहेजा शिकत असून कडक डाएट आणि व्यायामावर भर देत आहे.
१५ जूनपासून मालिका प्रेक्षकांच्या भेटीला: जवळपास सव्वा वर्ष हिंदी नाटकांमध्ये काम केल्यानंतर रोहित पुन्हा एकदा टीव्ही स्क्रीनवर परतत आहे. या मालिकेचा मुहूर्त साताऱ्यात झाला असून, मुंबईबाहेरील निसर्गरम्य वातावरणात याचे शूटिंग सुरू आहे. या मालिकेत निवेदिता सराफ यांच्यासोबत स्मिता सरवदे आणि संजय खापरे यांसारखे दिग्गज कलाकारही महत्त्वाच्या भूमिकेत दिसणार आहेत. ‘कृष्णाईच्या लेकी’ ही नवी मालिका येत्या १५ जून २०२६ पासून दररोज संध्याकाळी ७ वाजता झी मराठी वाहिनीवर प्रक्षेपित केली जाणार आहे.
