पुणे (pragatbharat.com) : पुण्यातून एक अत्यंत धक्कादायक आणि दुर्दैवी घटना समोर आली आहे. विश्रांतवाडी (Vishrantwadi) परिसरात राहणाऱ्या एका २३ वर्षीय प्रथम वर्ष एमबीबीएस (MBBS) विद्यार्थिनीने आपल्या राहत्या घरी गळफास लावून आत्महत्या केली आहे. रविवारी सकाळी ही घटना उघडकीस आली असून, या घटनेमुळे संपूर्ण वैद्यकीय क्षेत्रात आणि परिसरात मोठी खळबळ उडाली आहे.
कुटुंबियांना आढळला मृतदेह: मिळालेल्या माहितीनुसार, सदर विद्यार्थिनी कात्रज येथील एका नामांकित वैद्यकीय महाविद्यालयात शिक्षण घेत होती आणि आठवडाभर ती कॉलेजच्या हॉस्टेलमध्येच राहायची. वीकेंडला (शनिवार-रविवार) ती विश्रांतवाडी येथील आपल्या घरी येत असे. शनिवार रात्री सर्व कुटुंबियांनी एकत्र जेवण केले होते. रविवारी सकाळी जेव्हा तिच्या आईने तिला उठवण्यासाठी खोलीचा दरवाजा ठोठावला, तेव्हा आतून कोणताही प्रतिसाद मिळाला नाही. संशय आल्याने कुटुंबियांनी दरवाजा उघडला असता ती छताच्या पंख्याला लटकलेल्या अवस्थेत आढळून आली. तिला तातडीने जवळच्या रुग्णालयात नेण्यात आले, परंतु उपचारापूर्वीच डॉक्टरांनी तिला मृत घोषित केले. शनिवार मध्यरात्रीच्या सुमारास ही घटना घडली असावी, असा पोलिसांचा प्राथमिक अंदाज आहे.
संगीत क्षेत्राची आवड आणि नैराश्यावर उपचार सुरू: पोलिसांनी मुलीच्या खोलीची कसून झडती घेतली, मात्र घटनास्थळावरून कोणतीही सुसाईड नोट (Suicide Note) जप्त करण्यात आलेली नाही. प्राथमिक चौकशीत समोर आले आहे की, कुटुंबियांच्या इच्छेखातर तिने एमबीबीएस अभ्यासक्रमाला प्रवेश घेतला होता. मात्र, तिला गाण्याची प्रचंड आवड होती आणि तिला संगीत क्षेत्रात (Singer) आपले करिअर करायचे होते. तिच्या पालकांनी पोलिसांना दिलेल्या माहितीनुसार, ती गेल्या काही काळापासून नैराश्याचा (Depression) सामना करत होती आणि तिच्यावर वैद्यकीय उपचारही सुरू होते. याप्रकरणी विश्रांतवाडी पोलिसांनी सध्या अकस्मात मृत्यूची नोंद केली असून, तिच्या आत्महत्येमागील नेमके कारण शोधण्यासाठी पोलीस सर्व बाजूंनी तपास करत आहेत.
