पार्टी (pragatbharat.com) : फुटबॉल जगतातील सर्वात मोठी स्पर्धा म्हणजेच फिफा विश्वचषक २०२६ (FIFA World Cup 2026) चा थरार सुरू झाला असून, जगभरातील क्रीडाप्रेमींचे लक्ष पोर्तुगाल संघाकडे लागले आहे. पोर्तुगालचा महान फुटबॉलपटू ख्रिस्तियानो रोनाल्डो (Cristiano Ronaldo) याने संघाच्या रवानगीपूर्वी प्रसारमाध्यमांशी संवाद साधताना आपल्या सहकाऱ्यांवर मोठा विश्वास व्यक्त केला आहे. “ही खेळाडूंची अशी पिढी आहे, जी देशवासियांना सुखावेल आणि पोर्तुगीज जनतेला आनंद देईल,” अशा भावना रोनाल्डोने व्यक्त केल्या.
या ऐतिहासिक विश्वचषकात पोर्तुगाल संघ आपल्या मोहिमेची सुरुवात १७ जून २०२६ रोजी टेक्सासमधील ह्युस्टन स्टेडियमवर काँगो (Congo) विरुद्धच्या सामन्याने करणार आहे. पोर्तुगालने अद्याप एकदाही फिफा विश्वचषकाचे विजेतेपद मिळवलेले नाही, त्यामुळे यंदा हा संघ इतिहास रचणार का, याकडे चाहत्यांचे लक्ष आहे.
एक-एक पाऊल पुढे टाकणे महत्त्वाचे : रोनाल्डो आपल्या कारकिर्दीतील विक्रमी सहावा विश्वचषक खेळण्यासाठी सज्ज झालेला ४१ वर्षांचा ख्रिस्तियानो रोनाल्डो म्हणाला, “स्पर्धेत चांगली सुरुवात करणे अत्यंत महत्त्वाचे आहे. पहिल्या आणि दुसऱ्या सामन्यात उत्कृष्ट कामगिरी करून संघाने गटात (Group) अव्वल स्थान पटकावण्यावर लक्ष केंद्रित केले पाहिजे. आपण थेट विजेतेपदाचा विचार न करता प्रत्येक सामन्यागणिक (Match by Match) पुढे गेले पाहिजे. सुरुवातीलाच खूप मोठ्या अपेक्षा ठेवण्यापेक्षा टप्प्याटप्प्याने पुढे जाणे हाच योग्य मार्ग आहे.”
तो पुढे म्हणाला, “सध्याच्या पोर्तुगाल संघात अत्यंत प्रतिभावान खेळाडूंची पिढी आहे. मात्र, खेळाच्या मैदानावरील अनेक गोष्टी आपल्या नियंत्रणात नसतात. जय-पराजयावर अनेक घटकांचा परिणाम होत असतो. परंतु, मला पूर्ण खात्री आहे की ही पिढी पोर्तुगीज जनतेला नक्कीच अभिमान वाटावा अशी कामगिरी करेल.”
असा आहे फिफा विश्वचषक २०२६ चा पुढचा प्रवास:
- २९ जून २०२६ : ‘राउंड ऑफ ३२’ (सामन्यांची दुसरी फेरी) सुरू होईल.
- ४ जुलै २०२६ : ‘राउंड ऑफ १६’ चे सामने खेळवले जातील.
- १० जुलै २०२६ : विश्वचषक उपांत्यपूर्व (Quarter-finals) फेरीत प्रवेश करेल.
- १५ आणि १६ जुलै २०२६ : रंगतदार उपांत्य सामने (Semi-finals) होतील.
- १९ जुलै २०२६ : तिसऱ्या स्थानासाठीचा सामना खेळवला जाईल.
- २० जुलै २०२६ : ईस्ट रदरफोर्ड येथील प्रसिद्ध मेटलाईफ स्टेडियमवर महाअंतिम (Final) सामना रंगणार आहे.
या वर्षीचा फिफा विश्वचषक अनेक अर्थांनी खास आहे, कारण इतिहासात पहिल्यांदाच ४८ संघ या स्पर्धेत सहभागी होत असून एकूण १०४ सामने खेळवले जाणार आहेत. ४ संघांचे एकूण १२ गट तयार करण्यात आले असून, प्रत्येक गटातील अव्वल दोन संघ आणि तिसऱ्या स्थानावरील ८ सर्वोत्तम संघ पुढील फेरीत पात्र ठरतील. पोर्तुगालने २०२२ च्या विश्वचषकात उपांत्यपूर्व फेरी गाठली होती, मात्र मोरोक्कोविरुद्ध ०-१ ने पराभव पत्करावा लागला होता. यंदा त्याहून सरस कामगिरी करण्याचा निर्धार रोनाल्डो आणि कंपनीचा असणार आहे.
