वॉशिंग्टन (pragatbharat.com) :
अमेरिकेचे राष्ट्रपती डोनाल्ड ट्रम्प यांनी भारताचे पंतप्रधान नरेंद्र मोदी यांचे कौतुक करत त्यांना एक अत्यंत शक्तिशाली आणि प्रभावी जागतिक नेते म्हटले आहे. एका अमेरिकन वृत्तसंस्थेला दिलेल्या विशेष मुलाखतीत ट्रम्प यांनी पंतप्रधान मोदींचा उल्लेख चीनचे राष्ट्रपती क्षी जिनपिंग यांच्यासोबत जगातील सर्वात प्रभावशाली आणि परिणामकारक नेत्यांमध्ये केला आहे.
भारताला दिली राजकीय स्थिरता :
मुलाखतीदरम्यान ट्रम्प यांनी भारताच्या राजकीय इतिहासावर भाष्य करताना सांगितले की, “मी यापूर्वी भारतात दर सहा महिन्यांनी किंवा वर्षभराने सरकार आणि नेते बदलताना पाहिले आहेत. मात्र, पंतप्रधान मोदींनी गेल्या १२ वर्षांहून अधिक काळ सत्तेत राहून भारताला एक मजबूत आणि ठोस स्थिरता दिली आहे. ते दीड अब्ज लोकसंख्येच्या देशाचे नेतृत्व अत्यंत कुशलतेने करत आहेत. आंतरराष्ट्रीय पातळीवर त्यांना मोठा आदर मिळतो.”
‘मोदी बाहेरून शांत, पण आतून अत्यंत कणखर’ :
पंतप्रधान मोदींच्या कार्यपद्धतीवर बोलताना ट्रम्प म्हणाले, “पंतप्रधान मोदी जाहीरपणे खूप शांत आणि संयमी दिसतात. पण वास्तवात ते अत्यंत कणखर व्यक्ती (Tough Cookie) आहेत. त्यांची परराष्ट्र नीती अतिशय हुशार असून ते भारताला आंतरराष्ट्रीय युद्धांपासून लांब ठेवतात.”
भारत-अमेरिका व्यापारी संबंध झाले अधिक ‘फेअर’ :
दोन्ही देशांमधील संबंधांवर बोलताना ट्रम्प यांनी स्पष्ट केले की, भारत आणि अमेरिका यांच्यात मोठ्या प्रमाणावर व्यापार सुरू आहे. पूर्वीच्या तुलनेत आता दोन्ही देशांमधील द्विपक्षीय व्यापार अधिक न्याय्य (Fair Business) आणि संतुलित झाला आहे. काही दिवसांपूर्वीच फ्रान्समध्ये पार पडलेल्या ‘जी-७’ (G7) परिषदेच्या पार्श्वभूमीवर झालेल्या द्विपक्षीय भेटीनंतर ट्रम्प यांनी हे महत्त्वपूर्ण विधान केले आहे.
