पिंपरी-चिंचवड / मुंबई (pragatbharat.com) : पिंपरी-चिंचवड शहराच्या विकासाशी संबंधित महसूल, वन विभाग, भूमी अभिलेख तसेच गावठाण हद्दीतील अनेक वर्षांपासून रखडलेल्या प्रलंबित प्रश्नांना अखेर गती मिळणार आहे. राज्याचे महसूल मंत्री चंद्रशेखर बावनकुळे यांच्या अध्यक्षतेखाली सोमवार, २२ जून २०२६ रोजी मुंबईतील मंत्रालयात दोन महत्त्वपूर्ण उच्चस्तरीय बैठकांचे आयोजन करण्यात आले आहे. भाजपचे भोसरीचे आमदार महेश लांडगे यांनी शासनाकडे केलेल्या सातत्यपूर्ण पाठपुराव्यामुळे या बैठका होत असून, यात शहरातील अनेक महत्त्वाच्या विषयांवर थेट निर्णय घेतले जाण्याची शक्यता आहे.
दोन टप्प्यांत होणार महत्त्वाचा आढावा :
- सकाळी ११:०० वाजता (पहिली बैठक) : महसूल व वन विभागाशी संबंधित विषयांवर चर्चा होईल. यामध्ये शहरातील वनविभागाच्या जागांचे प्रलंबित प्रश्न, तसेच ‘हिंजवडी ते नवी सांगवी नदी सुधार प्रकल्पा’च्या अनुषंगाने खडकी, डुडुळगाव, चऱ्होली बुद्रुक आणि तळवडे येथील गावठाण हद्दीतील अडचणींवर तोडगा काढण्यात येईल.
- सायंकाळी ५:०० वाजता (दुसरी बैठक) : महसूल विभागाच्या या बैठकीत भूमी अभिलेख विभागातील पिंपरी-चिंचवड नवनगर (PCNTDA) कार्यालयाशी संबंधित प्रकरणे, तसेच खडकी, डुडुळगाव, चऱ्होली बुद्रुक, चोवीसावाडी आणि तळवडे गावांच्या गावठाण हद्दीतील विविध प्रलंबित विषयांचा सविस्तर आढावा घेतला जाईल.
वरिष्ठ प्रशासकीय अधिकाऱ्यांची उपस्थिती : या दोन्ही बैठकांना आमदार महेश लांडगे यांच्यासह महसूल व वन विभागाचे अपर मुख्य सचिव, पुणे विभागीय आयुक्त, वन सचिव, भूमी अभिलेख विभागाचे वरिष्ठ अधिकारी, पुण्याचे जिल्हाधिकारी, निवासी उपजिल्हाधिकारी आणि पिंपरी-चिंचवड महानगरपालिकेचे (PCMC) आयुक्त उपस्थित राहणार आहेत. सर्व विभागांना अद्ययावत अहवालासह उपस्थित राहण्याचे आदेश देण्यात आले आहेत. विविध विभागांमधील समन्वयाच्या अभावामुळे रखडलेल्या विकासकामांना गती देणे आणि नागरिकांच्या अडचणी सोडवणे हा या बैठकीचा मुख्य उद्देश आहे.
