मुंबई (pragatbharat.com) : आपल्या पाल्याला डॉक्टर बनवण्याचे स्वप्न पाहणाऱ्या पालकांची कोट्यवधी रुपयांची फसवणूक करणाऱ्या एका आंतरराज्यीय टोळीचा मुंबई पोलिसांनी पर्दाफाश केला आहे. MBBS प्रवेशाच्या नावाखाली कोट्यवधींचा गंडा घालणाऱ्या आणि गेल्या १२ वर्षांपासून पोलिसांना गुंगारा देणाऱ्या ५१ वर्षीय सराईत महाठगाला सर जे. जे. मार्ग पोलिसांनी (Sir JJ Marg Police) मुंबईतील आग्रीपाडा परिसरातून अतिशय फिल्मी स्टाईलने अटक केली आहे. हा आरोपी देशातील ५ वेगवेगळ्या राज्यांमध्ये तब्बल १८ ते २० फसवणुकीच्या गुन्ह्यांमध्ये वॉन्टेड होता.
ठाण्याच्या राजीव गांधी मेडिकल कॉलेजमध्ये प्रवेशाचे दिले आमिष पोलिसांनी दिलेल्या माहितीनुसार, आबिद युसूफ अन्सारी (वय ५१) असे अटक करण्यात आलेल्या आरोपीचे नाव आहे. विष्णू रत्न गुडेकर (वय ५३) या जागरूक पालकाने २०२४ मध्ये जे. जे. मार्ग पोलीस ठाण्यात या संदर्भात अधिकृत तक्रार दाखल केली होती. आरोपी अन्सारी याने गुडेकर यांच्या मुलाला ठाण्यातील कलवा येथील राजीव गांधी मेडिकल कॉलेजमध्ये (Rajiv Gandhi Medical College) सुरक्षित MBBS प्रवेश मिळवून देण्याचे खोटे आमिष दाखवले होते. त्यासाठी त्याने गुडेकर यांच्याकडून तब्बल ४२ लाख रुपये उकळले. मात्र, पैशांची देवाणघेवाण होऊनही प्रवेश न मिळाल्याने आणि पैसेही परत न मिळाल्याने अखेर फसवणुकीचा गुन्हा दाखल करण्यात आला.
१२ वर्षे फरार; ५ राज्यांच्या पोलिसांना घाम फोडणारा सराईत गुन्हेगार तपासादरम्यान पोलिसांना समजले की, आबिद अन्सारी हा केवळ मुंबईपुरता मर्यादित नसून तो एक आंतरराज्यीय सराईत गुन्हेगार आहे. महाराष्ट्र, गुजरात, दिल्ली, उत्तराखंड आणि मध्य प्रदेश या ५ राज्यांमध्ये तो गेल्या १२ वर्षांपासून सक्रिय होता. जळगावच्या न्यायालयाने त्याला यापूर्वीच ‘फरार’ घोषित केले होते. तो अटकेपासून वाचण्यासाठी दर काही दिवसांनी आपले ठिकाण आणि मोबाईल नंबर बदलत असे. त्याचा माग काढण्यासाठी पोलिसांनी तांत्रिक पाळत ठेवून गुजरात, राजस्थान, लोणावळा आणि महाबळेश्वर अशा अनेक ठिकाणी छापे टाकले होते. अखेर तो आग्रीपाडा येथील एका निवासी इमारतीत लपल्याची गुप्त माहिती पोलिसांना मिळाली.
६ तासांचे थरारक सर्च ऑपरेशन; वेशांतर करून पोलिसांनी ठोकल्या बेड्या उपनिरीक्षक प्रशांत नेरकर यांच्या नेतृत्वाखालील पथकाने आग्रीपाडा येथील इमारतीभोवती सापळा रचला. आरोपी ओळखू नये म्हणून पोलिसांनी वेशांतर करून तब्बल ६ तास गुप्त पाळत ठेवली. अखेर अचूक वेळ साधत आरोपी अन्सारी याला ताब्यात घेण्यात आले. प्राथमिक तपासात तो १८ ते २० मोठ्या शैक्षणिक घोटाळ्यांमध्ये मुख्य सूत्रधार असल्याचे स्पष्ट झाले आहे. व्यावसायिक अभ्यासक्रमांना प्रवेश देण्याच्या नावाखाली त्याने आणखी अनेक पालकांना कोट्यवधींचा चुना लावला असण्याची शक्यता जे. जे. मार्ग पोलीस ठाण्याच्या वरिष्ठ अधिकाऱ्यांनी व्यक्त केली असून, या रॅकेटमधील इतर साथीदारांचा शोध घेतला जात आहे.
