कल्याण (pragatbharat.com) : महाराष्ट्राला काळीमा फासणारी एक अत्यंत संतापजनक आणि क्रूर घटना कल्याण पूर्व भागात उघडकीस आली आहे. एका १५ वर्षांच्या असहाय्य अल्पवयीन मुलीला घरात डांबून दोन ६० वर्षीय वृद्धांनी तिच्यावर पाशवी लैंगिक अत्याचार केल्याची धक्कादायक घटना घडली आहे. पीडित मुलीच्या किंचाळण्याचा आवाज ऐकून जागरूक नागरिकांनी दाखवलेल्या तत्परतेमुळे या नराधमांचे कृत्य उघडकीस आले. या प्रकरणी कोळसेवाडी पोलिसांनी (Kolsewadi Police) तत्परता दाखवत दोन्ही नराधम आरोपींना बेड्या ठोकल्या आहेत.
रात्री घरातून आला किंचाळण्याचा आवाज; घरभर पसरले होते रक्त कल्याण पूर्व येथील कोळसेवाडी पोलीस ठाण्याच्या हद्दीत ही घटना घडली. रात्रीच्या सुमारास एका घरातून एका अल्पवयीन मुलीचा प्रचंड आरडाओरडा आणि किंचाळण्याचा आवाज येत होता. हा आवाज ऐकून आजूबाजूला राहणाऱ्या स्थानिक नागरिकांना जाग आली. संशय आल्याने नागरिकांनी तात्काळ त्या घराकडे धाव घेतली आणि कोळसेवाडी पोलिसांना फोन करून घटनेची माहिती दिली. पोलिसांनी घटनास्थळी धाव घेत दरवाजा उघडला असता, घरातील भीषण दृश्य पाहून सर्वांचेच काळीज चरर झाले. संपूर्ण घरभर रक्त पसरलेले होते. पोलिसांनी तातडीने पीडित मुलीची सुटका करत दोन्ही आरोपींना जागीच ताब्यात घेतले.
चहा विक्रेता आणि रिक्षाचालकाचे घृणास्पद कृत्य पोलीस सूत्रांकडून मिळालेल्या माहितीनुसार, अख्तर मणियार (वय ६०) आणि सलीम शेख (वय ६०) अशी अटक करण्यात आलेल्या नराधम आरोपींची नावे आहेत. आरोपी मणियार हा एपीएमसी (APMC) मार्केटमध्ये चहा विक्रीचा व्यवसाय करतो, तर सलीम शेख हा रिक्षाचालक आहे. पीडित मुलगी अत्यंत गरीब कुटुंबातील आहे. प्राथमिक माहितीनुसार, हे दोन्ही आरोपी रात्रीच्या वेळी मुलींना फुस लावून किंवा जबरदस्तीने या घरात घेऊन येत असत. नेहमीप्रमाणे काल रात्रीही त्यांनी या १५ वर्षीय मुलीला घरात आणून तिच्यावर पाशवी अत्याचार केला.
स्थानिक आमदार आणि लोकप्रतिनिधी आक्रमक या अत्यंत गंभीर आणि अंगावर काटा आणणाऱ्या घटनेनंतर संपूर्ण कल्याण परिसरात तीव्र संतापाची लाट उसळली आहे. कोळसेवाडी परिसरात अल्पवयीन मुलींवर होणाऱ्या अत्याचारांच्या घटनांमध्ये वाढ होत असल्याने स्थानिक लोकप्रतिनिधी कमालीचे आक्रमक झाले आहेत. भाजप आमदार सुलभा गायकवाड, शिवसेना शिंदे गटाचे शहराध्यक्ष व माजी नगरसेवक महेश गायकवाड यांच्यासह अनेक सामाजिक कार्यकर्त्यांनी कोळसेवाडी पोलीस ठाण्यात धाव घेतली. लोकप्रतिनिधींनी वरिष्ठ पोलीस अधिकाऱ्यांची भेट घेऊन या नराधम आरोपींवर ‘पोक्सो’ (POCSO) अंतर्गत अत्यंत कडक कलमे लावून त्यांना फाशीची शिक्षा होईल, यादृष्टीने तपास करण्याची आक्रमक मागणी केली आहे.
