मुंबई (pragatbharat.com) : महाराष्ट्राच्या राजकारणात सध्या मध्यरात्री घडणाऱ्या गुप्त घडामोडींनी उच्चांक गाठला आहे. शिवसेना ठाकरे गटाच्या ६ बंडखोर खासदारांनी थेट लोकसभा अध्यक्षांना स्वतंत्र गट स्थापन करण्याबाबत पत्र दिल्यानंतर, आता थेट मुख्यमंत्री एकनाथ शिंदे यांनी या सर्व खासदारांशी संपर्क साधल्याची खळबळजनक माहिती समोर आली आहे. सूत्रांकडून मिळालेल्या माहितीनुसार, रात्री उशिरा मुख्यमंत्री एकनाथ शिंदे आणि ठाकरे गटाच्या त्या ६ बंडखोर खासदारांमध्ये तब्बल ३० मिनिटे फोनवर (कॉन्फरन्स कॉल) सविस्तर चर्चा झाली आहे.
एकनाथ शिंदेंनी दिले मोठे आश्वासन, ‘ऑपरेशन टायगर’ यशस्वी? या अर्ध्या तासाच्या चर्चेदरम्यान मुख्यमंत्री एकनाथ शिंदे यांनी सर्व बंडखोर खासदारांना धीर देत, “शिवसेना तुमच्या पाठीशी खंबीरपणे उभी राहील,” असे मोठे आश्वासन दिल्याचे समजते. शिवसेना शिंदे गटाच्या सूत्रांनी दावा केला आहे की, त्यांचे ‘ऑपरेशन टायगर’ (Operation Tiger) पूर्णपणे यशस्वी झाले असून आता केवळ अधिकृत घोषणा करणे बाकी आहे. सुरक्षेच्या कारणास्तव या सर्व ६ खासदारांना सध्या अज्ञातस्थळी ठेवण्यात आले आहे. हे खासदार पूर्वी १९ जून रोजी शिंदे गटात प्रवेश करणार होते, परंतु आता ही तारीख थोडी पुढे ढकलण्यात आली आहे.
दिल्लीत ठाण मांडून बसले खासदार श्रीकांत शिंदे ठाकरे गटाला खिंडार पाडण्याचे हे संपूर्ण ‘ऑपरेशन टायगर’ अत्यंत गोपनीय पद्धतीने राबवले जात आहे. या संपूर्ण प्रक्रियेची धुरा खासदार श्रीकांत शिंदे यांच्याकडे सोपवण्यात आली असून, हे ऑपरेशन यशस्वी करण्यासाठी ते स्वतः दिल्लीत ठाण मांडून आहेत. लोकसभा अध्यक्षांच्या कायदेशीर प्रक्रियेपासून ते खासदारांच्या समन्वयापर्यंतची सर्व जबाबदारी श्रीकांत शिंदे पाहत आहेत.
ठाकरे गटाची दिल्लीत आज महत्त्वाची बैठक; शिस्तभंगाची तयारी दुसरीकडे, आपला गड वाचवण्यासाठी शिवसेना ठाकरे गटाने तातडीने हालचाली सुरू केल्या आहेत. पक्षाने आपल्या सर्व खासदारांना ‘व्हिप’ (Whip) बजावला असून, आज दिल्लीत संसदीय बोर्डाची महत्त्वाची बैठक बोलावली आहे. या बैठकीसाठी संजय राऊत, अनिल देसाई आणि अरविंद सावंत हे आधीच दिल्लीत दाखल झाले आहेत. विशेष म्हणजे, या बैठकीला ऑनलाईन पद्धतीने हजर राहता येणार नाही, खासदारांना प्रत्यक्षात उपस्थित राहावे लागेल. जे खासदार आज या बैठकीला गैरहजर राहतील, त्यांच्यावर थेट शिस्तभंगाची कारवाई करण्याचा इशारा ठाकरे गटाने दिला आहे. परंतु, शिंदेंच्या आश्वासनानंतर हे ६ खासदार आजच्या बैठकीला दांडी मारण्याची दाट शक्यता आहे.
