मुंबई (pragatbharat.com) : जगातील आणि आशियातील सर्वात श्रीमंत व्यक्तींच्या यादीत एक अतिशय मोठा आणि अनपेक्षित उलटफेर पाहायला मिळत आहे. ब्लूमबर्ग बिलिनिअर इंडेक्सने (Bloomberg Billionaires Index) जाहीर केलेल्या ताज्या रँकिंगनुसार, भारताचे दिग्गज उद्योगपती मुकेश अंबानी यांची आशियातील श्रीमंतांच्या यादीत तिसऱ्या क्रमांकावर घसरण झाली आहे. जगप्रसिद्ध शॉर्ट व्हिडिओ ॲप ‘टिकटॉक’ची (TikTok) पालक कंपनी असलेल्या ‘बाईटडांस’चे (ByteDance) सहसंस्थापक झांग यिमिंग यांनी अंबानींना मागे टाकत यादीत दुसऱ्या क्रमांकावर झेप घेतली आहे. कृत्रिम बुद्धिमत्ता (AI) क्षेत्रात बाईटडांस कंपनीने केलेली तुफानी घोडदौड झांग यिमिंग यांच्या या यशाचे मुख्य कारण ठरली आहे.
ताज्या आकडेवारीनुसार, बाईटडांसच्या मूल्यात झालेल्या प्रचंड वाढीमुळे झांग यिमिंग यांची एकूण संपत्ती आता ९२.८ अब्ज डॉलरवर पोहोचली असून, ते चीनमधील सर्वात श्रीमंत उद्योजक बनले आहेत. चीनमध्ये अत्यंत लोकप्रिय असलेल्या त्यांच्या ‘डौबाओ’ (Doubao) या AI चॅटबॉटचे सध्या ३० कोटींहून अधिक युझर्स आहेत. दुसरीकडे, भारताचे मुकेश अंबानी हे ८६.९ अब्ज डॉलरसह आशियात तिसऱ्या स्थानावर घसरले असून, जागतिक श्रीमंतांच्या यादीत ते २५ व्या क्रमांकावर फेकले गेले आहेत. दरम्यान, भारताचेच गौतम अदानी हे ११७.४ अब्ज डॉलर संपत्तीसह आशिया खंडातील सर्वात श्रीमंत व्यक्ती म्हणून पहिल्या स्थानावर घट्ट पाय रोवून आहेत.
जागतिक स्तरावरील टॉप-१० श्रीमंतांचा विचार केला तर, टेस्ला आणि स्पेसएक्सचे प्रमुख एलॉन मस्क हे ७२६ अब्ज डॉलरसह जगात पहिल्या क्रमांकावर अव्वल स्थानी आहेत. या यादीत गुगलचे संस्थापक लॅरी पेज (३०८ अब्ज डॉलर) दुसऱ्या, ओरॅकलचे लॅरी एलिसन (२९९ अब्ज डॉलर) तिसऱ्या, सर्गेई ब्रिन (२८६ अब्ज डॉलर) चौथ्या, तर ॲमेझॉनचे जेफ बेजोस (२७७ अब्ज डॉलर) पाचव्या क्रमांकावर आहेत. याशिवाय मायकल डेल, मार्क झुकरबर्ग, जेंसन हुआंग, बर्नार्ड अर्नॉल्ट आणि स्टीव्ह बालमर हे अनुक्रमे जगातील पहिल्या १० अब्जाधीशांच्या यादीत समाविष्ट आहेत. टेक कंपन्यांच्या शेअर्समधील तेजीमुळे जागतिक स्तरावर अब्जाधीशांच्या संपत्तीत मोठी चुरस पाहायला मिळत आहे.
