पुणे (pragatbharat.com) : राष्ट्रीय पात्रता प्रवेश परीक्षेच्या (NEET) पेपरफुटी प्रकरणाचे पुणे कनेक्शन आता कमालीचे गडद झाले आहे. या प्रकरणाचा तपास करणाऱ्या केंद्रीय अन्वेषण विभागाने (CBI) पुण्यातून अटक करण्यात आलेल्या आरोपी मनीषा हवालदार हिला पुण्याच्या विशेष न्यायालयात रात्री १२ वाजता हजर करून तिची ट्रान्झिट रिमांड मिळवली आहे. सीबीआयच्या तपासातून अत्यंत धक्कादायक माहिती समोर आली असून, हवालदारने पैशांच्या बदल्यात प्रश्न विकल्याचे आणि नंतर त्याचे पुरावे जाळून नष्ट केल्याचे उघड झाले आहे.
भौतिकशास्त्राची अनुवादक बनली पेपरफुटीची सूत्रधार: आरोपी मनीषा हवालदार ही राष्ट्रीय परीक्षा एजन्सीकडून (NTA) नीट परीक्षेच्या भौतिकशास्त्र (Physics) विषयाची अधिकृत अनुवादक (Translator) म्हणून कार्यरत होती. अधिकृत पदाचा गैरवापर करत तिने आर्थिक मोबदल्यासाठी दुसरी आरोपी मनीषा मांढरे हिच्याशी संगनमत केले आणि काही विद्यार्थ्यांना परीक्षेपूर्वीच प्रश्न पुरवले. मनीषा हवालदारने नीट संदर्भातील प्रश्नांच्या हस्तलिखित नोंदी (Handwritten Notes) तयार करून स्वतःकडे ठेवल्या होत्या, ज्या नंतर व्हॉट्सॲप आणि प्रिंटआउटद्वारे पुढे पाठवण्यात आल्या.
तपास यंत्रणांना चकवण्यासाठी नोट्स जाळल्या आणि चॅट केले डिलीट: सीबीआय तपासात समोर आलेल्या माहितीनुसार, तपास यंत्रणांच्या हाती कोणताही पुरावा लागू नये म्हणून आरोपी मनीषा हवालदार हिने भौतिकशास्त्र विषयाच्या प्रश्नमंजुषा असलेल्या सर्व मूळ “नोट्स” जाळून नष्ट केल्या. एवढेच नव्हे तर, मनीषा हवालदार आणि मनीषा मांढरे यांच्यात झालेले सर्व व्हॉट्सॲप चॅटिंगही डिलीट करण्यात आले आहे. विशेष म्हणजे, हवालदारने स्वतःचा फोन वाचवण्यासाठी आपल्या पतीच्या मोबाईल फोनचा वापर करून मनीषा मांढरेला प्रश्नमालिका पाठवल्याचे सीबीआयने शोधून काढले आहे.
तोंडपाठ प्रश्नांमुळे सीबीआय अधिकारीही चक्रावले: या प्रकरणातील दुसरी मुख्य आरोपी मनीषा मांढरे हिला सध्या १४ दिवसांची सीबीआय कोठडी सुनावण्यात आली आहे. मांढरेच्या चौकशीत तांत्रिक अडचणी येत असून तिची अफाट स्मरणशक्ती पाहून सीबीआयचे अधिकारीही चक्रावले आहेत. मनीषा मांढरेला नीट परीक्षेचे सर्व प्रश्न तोंडपाठ होते. तिने कोणताही लेखी किंवा डिजिटल पुरावा मागे न ठेवता केवळ आपल्या स्मरणशक्तीच्या जोरावर हा काळाबाजार चालवला होता. नीट पेपरफुटीतील अन्य एक आरोपी मनीषा वाघमारे हिने चौकशीत नाव घेतल्यानंतरच सीबीआयने मनीषा मांढरेला अटक केली होती.
मनीषा हवालदार हिला सीबीआयकडून पुढील चौकशीसाठी आणि पुढील कारवाईसाठी दिल्ली न्यायालयात हजर केले जाण्याची दाट शक्यता आहे. या मोठ्या रॅकेटमध्ये पुण्यातील आणखी काही बड्या नावांचा समावेश आहे का, याचा शोध आता सीबीआय घेत आहे.
