पुणे (pragatbharat.com) : “आयुष्यभर तुम्ही कितीही चांगले काम केले, तरी एक चूक ते सगळे धुळीस मिळवू शकते,” याचाच प्रत्यय नुकताच देशात गाजलेल्या ‘नीट’ (NEET) पेपरफुटी प्रकरणातून समोर आला आहे. या घोटाळ्याप्रकरणी केंद्रीय अन्वेषण विभागाने (CBI) पुण्यातील नामांकित मॉडर्न कला, विज्ञान आणि वाणिज्य महाविद्यालयातील वरिष्ठ प्राध्यापिका मनीषा गुरुनाथ मांढरे (वय ५७) यांना अटक केली आहे. अवघ्या सात महिन्यांवर निवृत्ती आलेली असताना घेतलेल्या एका चुकीच्या निर्णयामुळे त्यांच्या २४ वर्षांच्या शैक्षणिक कारकिर्दीला मोठी काळिमा फासली गेली आहे.
प्रश्नपत्रिका निर्मिती समितीच्या ‘तज्ज्ञ’ पदाचा गैरवापर: प्राध्यापिका मनीषा मांढरे या गेल्या २४ वर्षांपासून मॉडर्न महाविद्यालयात अकरावी-बारावीच्या विद्यार्थ्यांना वनस्पतिशास्त्र (Botany) शिकवत होत्या. शिक्षण क्षेत्रातील त्यांच्या अफाट अनुभवामुळे राष्ट्रीय परीक्षा यंत्रणेने (NTA) त्यांची नीट परीक्षेच्या प्रश्नपत्रिका निर्मिती समितीवर ‘तज्ज्ञ’ (Expert) म्हणून नियुक्ती केली होती. मात्र, याच अत्यंत महत्त्वाच्या आणि गोपनीय पदाचा गैरवापर करून त्यांनी पेपर फोडल्याचा खळबळजनक आरोप सीबीआयने केला आहे.
घरीच घेतली ‘विशेष शिकवणी’; लाखो रुपयांची वसुली: सीबीआयच्या तपासातून समोर आलेल्या माहितीनुसार, प्राध्यापिका मांढरे यांना वनस्पतिशास्त्र आणि प्राणिशास्त्र (Zoology) या दोन्ही विषयांच्या प्रश्नपत्रिकांचा पूर्ण अॅक्सेस होता. एप्रिल २०२६ मध्ये त्यांनी पुण्याच्याच मनीषा वाघमारे यांच्या मदतीने काही निवडक विद्यार्थ्यांना एकत्र केले. त्यानंतर आपल्या राहत्या घरी या विद्यार्थ्यांसाठी विशेष ‘गुप्त शिकवणी’ घेतली. या शिकवणीत विद्यार्थ्यांना प्रत्यक्ष नीट परीक्षेत येणारे फुटलेले प्रश्न आणि त्यांची उत्तरे लिहून देण्यात आली. या बदल्यात त्यांनी प्रति विद्यार्थी लाखो रुपये उकळल्याचा संशय आहे.
पुण्याचे शैक्षणिक वर्तुळ हादरले: या प्रकरणातील मुख्य संशयित पी. व्ही. कुलकर्णी यांच्या चौकशीनंतर सीबीआयने थेट पुण्यात येऊन ही मोठी कारवाई केली आहे. सेवानिवृत्तीच्या उंबरठ्यावर असलेल्या एका वरिष्ठ महिला प्राध्यापिकेचा आंतरराज्यीय पेपरफुटी रॅकेटमध्ये असा थेट सहभाग समोर आल्याने पुण्यातील शैक्षणिक वर्तुळासह संपूर्ण राज्यात प्रचंड खळबळ उडाली आहे. या रॅकेटमध्ये पुण्यातील आणखी काही बड्या व्यक्तींचे हात गुंतले आहेत का, याचा सखोल तपास सीबीआय करत आहे.
