मुंबई (pragatbharat.com) : भारतीय पाळीव प्राणी प्रेमींच्या (Pet Lovers) मानसिकतेत आणि आवडीनिवडीत गेल्या काही वर्षांत वेगाने बदल होत असल्याचे समोर आले आहे. एका प्रसिद्ध क्विक कॉमर्स प्लॅटफॉर्मच्या (Instamart) जून २०२५ ते जून २०२६ दरम्यानच्या ताज्या वार्षिक अहवालानुसार, भारतात आता कुत्र्यांपेक्षा मांजरा पाळण्याकडे आणि त्यांच्या संगोपनाकडे नागरिकांचा कल प्रचंड वाढला आहे. या अहवालात मुंबईला भारताची ‘कॅट कॅपिटल’ (मांजरांची राजधानी) म्हणून घोषित करण्यात आले आहे, कारण मुंबईत मांजरांच्या खाद्यपदार्थांची विक्री देशात सर्वाधिक झाली आहे.
मांजरांच्या खाद्याची मागणी ६० टक्क्यांवर; कोलकाता सर्वात पुढे: अहवालातील आकडेवारीनुसार, प्लॅटफॉर्मवर पाळीव प्राण्यांच्या एकूण खाद्यपदार्थांच्या मागणीपैकी एकट्या मांजरांच्या खाद्याचा (Cat Food) वाटा तब्बल ६० टक्के आहे. तसेच ‘कॅट फूड’ हा या प्लॅटफॉर्मवर सर्वाधिक शोधला गेलेला शब्द ठरला आहे.
- कोलकाता आघाडीवर: टक्केवारीचा विचार केला तर कोलकाता हे भारतातील सर्वात जास्त मांजरप्रेमी शहर ठरले आहे. येथे कुत्रे आणि मांजरांच्या एकूण ऑर्डर्सपैकी ८० टक्क्यांहून अधिक ऑर्डर्स एकट्या मांजरांसाठी आहेत.
- बेंगळुरू कुत्र्यांसाठी प्रसिद्ध: कुत्र्यांवर सर्वाधिक प्रेम करणाऱ्या शहरांमध्ये बेंगळुरू पहिल्या क्रमांकावर असून, त्यानंतर हैदराबाद आणि मुंबईचा क्रमांक लागतो. मात्र, पाळीव प्राण्यांचे चोचले पुरवण्यात (Pampering) बेंगळुरू देशात अव्वल आहे.
केवळ अन्नच नाही, तर ग्रुमिंग आणि आईस्क्रीमलाही मागणी: भारतीय पेट पेरेंट्स (Pet Parents) आता त्यांच्या प्राण्यांच्या आरोग्याबाबत कमालीचे जागरूक झाले आहेत. १. डॉग शॅम्पूच्या सर्चमध्ये तब्बल ६०० टक्क्यांची वाढ झाली आहे. २. धान्याविरहित (Grain-free) दर्जेदार अन्नपदार्थांची मागणी १५२ टक्क्यांनी वाढली आहे. ३. कुत्र्यांसाठीच्या ‘डॉग आईस्क्रीम’च्या शोधात २४५ टक्के, तर प्रोटीनयुक्त ट्रीट ब्रँड्सच्या मागणीत १,०९७ टक्क्यांची विक्रमी वाढ झाली आहे. ४. याशिवाय ‘बर्ड फूड’ (पक्ष्यांचे अन्न) १७८ टक्के आणि सशांचे अन्न १३० टक्क्यांनी वाढले आहे. दिल्लीतील एका प्राणिप्रेमीने तर एका वर्षात पाळीव प्राण्यांवर तब्बल ६०,९५७ रुपये खर्च केले आहेत.
टियर-२ शहरांमध्ये पाळीव प्राण्यांची क्रेझ वाढली: हा ट्रेंड केवळ मुंबई, बेंगळुरूसारख्या महानगरांपुरता मर्यादित राहिलेला नाही. टियर-२ शहरांमध्ये पाळीव प्राण्यांच्या ऑर्डर्समध्ये ९६ टक्क्यांची वार्षिक वाढ झाली आहे. यामध्ये गुवाहाटी (१४७३% वाढ), दिब्रुगड (७९६% वाढ) आणि मेरठ (६७७% वाढ) ही शहरे आघाडीवर आहेत. तर महाराष्ट्रातील नाशिक, कोल्हापूर आणि देशातील राजकोट, पाटणा, सिलिगुडी या शहरांमध्येही पाळीव प्राण्यांच्या उत्पादनांची बाजारपेठ ५० टक्क्यांपेक्षा जास्त गतीने वाढत आहे.
