मुंबई (pragatbharat.com) : महाराष्ट्र राज्य कौशल्य, व्यवसाय शिक्षण व प्रशिक्षण मंडळांतर्गत (MSBSVEE) विविध अतांत्रिक गटातील अभ्यासक्रम करणाऱ्या विद्यार्थ्यांसाठी राज्य सरकारने मोठा निर्णय घेतला आहे. सन २०२६-२७ या शैक्षणिक वर्षापासून अतांत्रिक गटातील प्रमाणपत्र व पदविका अभ्यासक्रमांच्या नवीन तसेच अधिकच्या तुकड्यांना स्वयंअर्थसहाय्यित (Self-Financed) तत्त्वावर सुरू करण्यास अधिकृत मान्यता देण्यात आली आहे.
या निर्णयामुळे फॅशन डिझाइनिंग, हॉटेल मॅनेजमेंट, ब्युटी कल्चर, ट्रॅव्हल अँड टुरिझम आणि इतर व्यावसायिक अतांत्रिक अभ्यासक्रमांसाठी आता अधिक जागा उपलब्ध होणार आहेत. राज्य सरकारने आज, २२ एप्रिल २०२६ रोजी यासंबंधीचा सविस्तर शासन निर्णय (GR) निर्गमित केला आहे. ज्या शैक्षणिक संस्थांनी नवीन तुकड्यांसाठी अर्ज केले होते, त्यांना विहित अटी व शर्तींच्या अधीन राहून ही मंजुरी देण्यात आली आहे.
या योजनेअंतर्गत संस्थांना शासनाकडून कोणतेही आर्थिक अनुदान मिळणार नाही, मात्र वाढत्या विद्यार्थी संख्येचा विचार करून प्रवेश क्षमता वाढवण्यास मुभा देण्यात आली आहे. यामुळे ग्रामीण आणि शहरी भागातील जास्तीत जास्त तरुणांना रोजगाराभिमुख शिक्षण घेण्याची संधी मिळणार असून, उद्योजकता विकासाला मोठी चालना मिळेल, असा विश्वास विभागाकडून व्यक्त करण्यात आला आहे.