मुंबई (pragatbharat.com) : छत्रपती शिवाजी महाराज आंतरराष्ट्रीय विमानतळ (CSMIA) परिसरात येणाऱ्या प्रवाशांची रिक्षाचालकांकडून होणारी फसवणूक आणि लूट रोखण्यासाठी मुंबई पोलिसांनी एक धडक कारवाई केली आहे. विमानतळाबाहेर प्रवाशांची अडवणूक करणाऱ्या, जादा भाडे मागणाऱ्या आणि प्रवाशाच्या वेशातील ‘अंडरकव्हर’ (गुप्तरोग) पोलिसालाच धमकावणाऱ्या एका मुजोर रिक्षाचालकाला सहार वाहतूक पोलिसांनी ‘स्टिंग ऑपरेशन’ (Sting Operation) करून रंगेहात अटक केली आहे. मोहम्मद अस्लम शेख (वय ४५, रा. जोगेश्वरी) असे अटक करण्यात आलेल्या आरोपी रिक्षाचालकाचे नाव आहे.
फिल्मी स्टाईलने रचला सापळा सहार वाहतूक पोलिसांना विमानतळ परिसरात प्रवाशांची लूट होत असल्याच्या अनेक तक्रारी मिळाल्या होत्या. या पार्श्वभूमीवर पोलिसांनी मंगळवारी संध्याकाळी विमानतळावरून बाहेर जाणाऱ्या रस्त्यावर एक विशेष मोहीम आखली. या मोहिमेत एक पोलीस अधिकारी साध्या कपड्यात प्रवासी म्हणून उभा राहिला. आरोपी मोहम्मद अस्लम शेख याने स्वतःहून या पोलिसाला गाठले आणि कुठे जायचे आहे, असे विचारले.
३५० रुपयांवरून थेट ५०० रुपयांची खंडणी साध्या कपड्यातील पोलीस अधिकाऱ्याने ‘बोरिवली’ जायचे असल्याचे सांगताच, आरोपीने मीटर सोडून थेट ३५० रुपयांची मागणी केली. अधिकाऱ्याने भाड्याबाबत विचारणा केली असता, रिक्षाचालकाने उडवाउडवीची उत्तरे दिली आणि रिक्षामध्ये बसण्यास भाग पाडले. मात्र, रिक्षा थोड्या अंतरावर जाताच त्याने वाहन फिरवले आणि बुकिंग करावे लागेल असे सांगितले. पोलीस अधिकाऱ्याने यावर आक्षेप घेतला असता तो चिडला आणि त्याने थेट धमकी दिली. तो म्हणाला, “चूपचाप ५०० रुपये द्यावे लागतील… नाहीतर मी तुझ्याशी बघून घेईन.”
संकेत मिळताच पोलिसांनी ठोकल्या बेड्या आरोपीने धमकी देताच, आधीच ठरलेल्या नियोजनानुसार अंडरकव्हर पोलीस अधिकाऱ्याने दबा धरून बसलेल्या सहकाऱ्यांना आणि पंचांना इशारा (Signal) केला. इशारा मिळताच दबा धरून बसलेल्या पोलीस पथकाने तात्काळ धाव घेत रिक्षा अडवली आणि आरोपीला ताब्यात घेतले. पोलिसांनी आरोपी शेख याला सहार पोलीस ठाण्यात आणले असून, प्रवाशांकडून अतिरिक्त भाडे उकळणे, धमकावून खंडणी वसूल करण्याचा प्रयत्न करणे आणि फसवणूक करणे या गुन्ह्याखाली भारतीय न्याय संहितेच्या (BNS) विविध कलमांनुसार एफआयआर (FIR) नोंदवून कायदेशीर कारवाई केली आहे.
