पुणे (pragatbharat.com) : जगभरात आज १२ मे २०२६ रोजी ‘जागतिक परिचारिका दिन’ (International Nurses Day) मोठ्या उत्साहात साजरा केला जात आहे. आधुनिक शुश्रूषाशास्त्राच्या जननी फ्लोरेन्स नाइटिंगेल यांचा आज जन्मदिन. त्यांच्या आरोग्य क्षेत्रातील अतुलनीय योगदानाची स्मृती म्हणून हा दिवस परिचारिकांच्या सन्मानार्थ समर्पित करण्यात आला आहे.
कोणत्याही रुग्णालयाचा कणा हा तिथल्या परिचारिका असतात. डॉक्टर उपचार सुचवत असले, तरी प्रत्यक्ष जमिनीवर उतरून रुग्णाची २४ तास सेवा करणे, त्याला मानसिक आधार देणे आणि औषधोपचारांची अंमलबजावणी करणे ही महत्त्वाची जबाबदारी परिचारिका पार पाडतात. विशेषतः ग्रामीण भागातील प्राथमिक आरोग्य केंद्रांपासून ते शहरांमधील मोठ्या मल्टिस्पेशालिटी हॉस्पिटल्सपर्यंत परिचारिकांचे कार्य वंदनीय आहे.
यंदाच्या जागतिक परिचारिका दिनाचे औचित्य साधून महाराष्ट्र राज्य आरोग्य विभागाच्या वतीने विविध रुग्णालयांमध्ये उत्कृष्ट सेवा देणाऱ्या परिचारिकांचा गौरव करण्यात येत आहे. आरोग्यावरील खर्च आणि परिचारिकांच्या कामाची स्थिती सुधारणे यावर यंदा जागतिक स्तरावर भर दिला जात आहे. आपल्या जीवाची पर्वा न करता रुग्णांना नवजीवन देणाऱ्या या ‘व्हाईट एंजल्स’ना ‘प्रगत भारत’ परिवारातर्फे मानाचा मुजरा!