मुंबई (pragatbharat.com) : भारतरत्न डॉ. बाबासाहेब आंबेडकर यांच्या १३५ व्या जयंती उत्सवानिमित्त दादर येथील शिवाजी पार्क मैदानावर प्रथमच भव्य ड्रोन शो आणि सांस्कृतिक कार्यक्रमाचे आयोजन करण्यात आले होते. “डॉ. बाबासाहेब आंबेडकरांनी दिलेल्या संविधानामुळेच आज देशाचा सर्वसमावेशक विकास शक्य झाला आहे,” असे गौरवोद्गार सामाजिक न्याय मंत्री संजय शिरसाट यांनी यावेळी काढले.
आकाशात साकारला महामानवाचा जीवनप्रवास: या ऐतिहासिक सोहळ्याचे मुख्य आकर्षण म्हणजे आधुनिक तंत्रज्ञानाचा वापर करून सादर करण्यात आलेला ड्रोन शो. सुमारे २००० ड्रोनच्या साहाय्याने आकाशात डॉ. बाबासाहेब आंबेडकरांची प्रकाशचित्रे आणि त्यांच्या जीवनातील महत्त्वाचे टप्पे साकारण्यात आले. भारतीय संविधानाचे महत्त्व आणि महामानवाने घडवलेली सामाजिक क्रांती या ड्रोन शोच्या माध्यमातून जिवंत करण्यात आली, जी उपस्थितांच्या डोळ्यांचे पारणे फेडणारी ठरली.
मान्यवरांची उपस्थिती आणि मार्गदर्शन: यावेळी केंद्रीय राज्यमंत्री रामदास आठवले, सांस्कृतिक कार्य मंत्री ॲड. आशिष शेलार, आमदार अमित साटम, सदा सरवणकर यांसह अनेक मान्यवर उपस्थित होते. मंत्री शिरसाट यांनी तरुणांना वाचनाची सवय जोपासण्याचे आवाहन करत बाबासाहेबांचे विचार आत्मसात करण्याचे महत्त्व पटवून दिले. मंत्री आशिष शेलार यांनी भारतीय संविधान हे जगासाठी मार्गदर्शक असल्याचे नमूद केले, तर रामदास आठवले यांनी ड्रोन शोच्या माध्यमातून नव्या पिढीपर्यंत बाबासाहेबांचा संदेश पोहोचवणे हा अभिनव उपक्रम असल्याचे सांगितले. प्रसिद्ध गायिका वैशाली माडे यांच्या सांस्कृतिक कार्यक्रमाने या सोहळ्याची रंगत अधिकच वाढवली.
