मुंबई (pragatbharat.com) : महाराष्ट्राच्या राजकारणात सध्या ‘ऑपरेशन टायगर’ आणि संभाव्य पक्षांतराच्या चर्चांनी जोर धरला असतानाच, ठाकरे गटाचे खासदार संजय दिना पाटील आणि उपमुख्यमंत्री एकनाथ शिंदे यांच्या एकत्र प्रवासामुळे मोठी खळबळ उडाली आहे. या भेटीनंतर खुद्द उद्धव ठाकरे यांनी संजय दिना पाटील यांना फोन केल्याने राजकीय तर्कवितर्कांना उधाण आले आहे.
काय आहे नेमके प्रकरण? खासदार संजय दिना पाटील यांच्या पत्नीचा काही दिवसांपूर्वी अपघात झाला होता. त्यांच्यावर मुंबईतील फोर्टीस रुग्णालयात उपचार सुरू आहेत. आपल्या जुन्या सहकाऱ्याच्या पत्नीच्या प्रकृतीची विचारपूस करण्यासाठी उपमुख्यमंत्री एकनाथ शिंदे रुग्णालयात गेले होते. मात्र, रुग्णालय सोडताना संजय दिना पाटील हे चक्क एकनाथ शिंदे यांच्या गाडीत बसून त्यांच्यासोबत गेल्याने सर्वांच्या भुवया उंचावल्या. महाविकास आघाडीचे खासदार सत्ताधारी नेत्यासोबत एकाच गाडीतून प्रवास करत असल्याचा व्हिडिओ सोशल मीडियावर वाऱ्यासारखा पसरला.
उद्धव ठाकरेंचा फोन आणि विचारपूस: या भेटीची आणि प्रवासाची बातमी वाऱ्यासारखी पसरताच शिवसेना पक्षप्रमुख उद्धव ठाकरे यांनी तातडीने संजय दिना पाटील यांना फोन लावला. सूत्रांनी दिलेल्या माहितीनुसार, उद्धव ठाकरे यांनी या फोन कॉलद्वारे पाटील यांच्या पत्नीच्या तब्येतीची आस्थेवाईकपणे चौकशी केली. अपघाताचे स्वरूप आणि उपचारांबाबत माहिती घेत त्यांनी पाटील कुटुंबाला धीर दिला. वरवर ही विचारपूस वैयक्तिक वाटत असली, तरी शिंदे यांच्यासोबतच्या प्रवासामुळे उद्धव ठाकरेंनी हा फोन करून परिस्थितीचा आढावा घेतल्याचे बोलले जात आहे.
राजकीय चर्चांना उधाण: एकनाथ शिंदे आणि संजय दिना पाटील हे जुने सहकारी असले तरी, सध्याच्या राजकीय परिस्थितीत एकाच गाडीतून प्रवास करणे याला ‘ऑपरेशन टायगर’शी जोडले जात आहे. ठाकरे गटातील काही खासदार शिंदेंच्या संपर्कात असल्याच्या अफवा आधीच सुरू असताना, या घटनेने त्यात तेल ओतले आहे. ही भेट केवळ सदिच्छा भेट होती की यामागे काही राजकीय समीकरणे दडली आहेत, हे येणारा काळच ठरवेल.