जळगाव (pragatbharat.com) : जळगाव शहरातील पिंप्राळा परिसरात गेल्या काही दिवसांपासून नागरिकांना अत्यंत दूषित पाण्याचा पुरवठा होत असल्याने संताप व्यक्त केला जात आहे. नळाला चक्क मातीच्या रंगाचे आणि कचरायुक्त पाणी येत असल्याने परिसरातील शेकडो नागरिकांचे आरोग्य धोक्यात आले आहे. विशेषतः ओमकार पार्क भागात ही समस्या अधिक गंभीर बनली असून, पिण्याच्या पाण्यासाठी रहिवाशांची मोठी ओढाताण होत आहे.
आरोग्याचा प्रश्न गंभीर: स्थानिक नागरिकांनी दिलेल्या माहितीनुसार, नळ सोडल्यानंतर सुरुवातीला मोठ्या प्रमाणात माती आणि गाळ मिश्रित पाणी येते. अनेकदा या पाण्यात इतर कचराही आढळून येत आहे. हे पाणी पिण्यायोग्य नसल्याने नागरिकांना विकतचे पाणी घ्यावे लागत आहे. दूषित पाण्यामुळे पोटाचे विकार आणि साथीचे आजार पसरण्याची भीती व्यक्त केली जात असून, महापालिकेने याकडे तातडीने लक्ष द्यावे, अशी मागणी होत आहे.
जलवाहिनी फुटल्याचा संशय: पिंप्राळा भागातील मुख्य जलवाहिनी (Pipeline) कुठेतरी फुटली असावी किंवा ड्रेनेज लाईनशी तिचा संपर्क आला असावा, असा संशय नागरिकांनी व्यक्त केला आहे. जलवाहिनीमध्ये माती शिरत असल्यानेच असा पुरवठा होत असल्याचे प्राथमिक दर्शनी दिसत आहे.
महापालिकेकडे तक्रार: ओमकार पार्क परिसरातील रहिवाशांनी जळगाव महापालिकेच्या पाणीपुरवठा विभागाकडे याप्रकरणी लेखी तक्रार केली आहे. प्रशासनाने तात्काळ जलवाहिनीची तपासणी करून दुरुस्ती करावी, अन्यथा तीव्र आंदोलन छेडण्याचा इशारा नागरिकांनी दिला आहे. सध्या उन्हाळ्याचे दिवस असल्याने पाण्याचे महत्त्व वाढले आहे, अशात दूषित पाणी पुरवठ्यामुळे नागरिकांमध्ये प्रचंड असंतोष आहे.
