सोलापूर (pragatbharat.com) : सोलापूर शहरात गुन्हेगारांनी पुन्हा एकदा डोके वर काढले असून भरदिवसा झालेल्या एका भीषण हत्येने संपूर्ण शहर हादरून गेले आहे. शहरातील वर्दळीच्या ७० फूट रोड परिसरात पाच जणांच्या टोळक्याने एका तरुणाची गाडी अडवून त्याची दगडाने ठेचून निर्घृण हत्या केली. सुरेश श्रीराम असे मृत तरुणाचे नाव असून, या घटनेचा अंगावर काटा आणणारा व्हिडिओ सीसीटीव्ही (CCTV) कॅमेऱ्यात कैद झाला आहे.
मिळालेल्या प्राथमिक माहितीनुसार, ही घटना वर्चस्ववाद आणि पूर्ववैमनस्यातून घडल्याचे समोर येत आहे. सुरेश श्रीराम हा आपल्या दुचाकीवरून जात असताना पाच जणांच्या टोळक्याने त्याला गाठले आणि त्याची गाडी अडवली. आरोपींनी सुरुवातीला त्याच्यावर कोयत्याने सपासप वार केले. रक्ताच्या थारोळ्यात पडलेल्या सुरेशला वाचवण्यासाठी कोणीही पुढे येण्याआधीच, नराधम आरोपींनी मोठ्या दगडाने त्याचे डोके ठेचून त्याला जागीच संपवले.
भररस्त्यात घडलेल्या या क्रूर कृत्यामुळे सोलापूरकरांमध्ये भीतीचे वातावरण पसरले आहे. घटनेची माहिती मिळताच पोलिसांनी तातडीने धाव घेत घटनास्थळाचा पंचनामा केला. पोलिसांनी याप्रकरणातील काही संशयित आरोपींना ताब्यात घेतले असून अधिक तपास सुरू केला आहे. भरदिवसा घडलेल्या या घटनेमुळे पोलिसांच्या गस्तीवर आणि शहरातील कायदा व सुव्यवस्थेवर पुन्हा एकदा प्रश्नचिन्ह उपस्थित केले जात आहे. मृत सुरेशच्या पश्चात कुटुंबावर दुःखाचा डोंगर कोसळला असून, आरोपींना कठोर शिक्षा देण्याची मागणी होत आहे.