मुंबई (गोवंडी) (pragatbharat.com) : आपल्या लहान भावाला चुकीच्या मार्गावर जाण्यापासून आणि वाईट संगतीपासून वाचवण्याच्या प्रयत्नात एका १७ वर्षीय मुलाला रक्ताच्या थारोळ्यात पडावे लागल्याची धक्कादायक घटना गोवंडी परिसरात घडली आहे. अजमल अन्सारी (वय १७) असे जखमी तरुणाचे नाव असून, त्याच्यावर साइन रुग्णालयातील (Sion Hospital) अतिदक्षता विभागात (ICU बर) उपचार सुरू आहेत.
मिळालेल्या माहितीनुसार, अजमलचा लहान भाऊ रेहमत हा आफान उर्फ सैफ अली याच्यासोबत रात्री उशिरापर्यंत बाहेर फिरत असे. अफानची संगत आपल्या भावासाठी घातक ठरू शकते, हे ओळखून अजमलने यापूर्वी दोघांनाही समज दिली होती आणि रात्री उशिरा बाहेर फिरण्यापासून रोखले होते. अजमलच्या या हस्तक्षेपानंतर रेहमतने अफानशी बोलणे आणि त्याच्यासोबत फिरणे बंद केले होते.
हाच राग मनात धरून ३ मे २०२६ रोजी रात्री साधारण ८:३० वाजता, जेव्हा अजमल आपला मित्र आमिरसोबत बैगणवाडीतील रोड नंबर ११ वरून घरी परतत होता, तेव्हा अफानने त्याला अडवले. “तुझ्यामुळेच रेहमत माझ्याशी बोलत नाही,” असे म्हणत अफानने अजमलला शिवीगाळ केली आणि आपल्या जवळील चाकूने त्याच्या बरगड्यांत सपासप वार केले. या हल्ल्यात अजमल गंभीर जखमी झाला.
अजमलचे वडील शमीम इनुल अन्सारी यांनी दिलेल्या तक्रारीवरून गोवंडी पोलिसांनी अफानविरुद्ध गुन्हा दाखल केला असून पुढील तपास सुरू आहे. या घटनेमुळे गोवंडी परिसरात तणावाचे वातावरण असून, पालकांनी आपल्या मुलांच्या संगतीबाबत सतर्क राहण्याचे आवाहन पोलिसांनी केले आहे.