मुंबई (pragatbharat.com) : मुंबईची ओळख असलेल्या मरीन ड्राइव्ह परिसरात एका महिला दुचाकीस्वाराचा पाठलाग करून तिला त्रास देणाऱ्या व्यक्तीची ओळख पटवण्यात मुंबई पोलिसांना यश आले आहे. या घटनेचा व्हिडिओ सोशल मीडियावर प्रचंड व्हायरल झाल्यानंतर आणि जनक्षोभ उसळल्यानंतर पोलिसांनी या प्रकरणाची गंभीर दखल घेत ‘सुओ मोटो’ (स्वत:हून) कारवाई सुरू केली आहे.
नेमकी घटना काय? संबंधित महिला दुचाकीस्वार रात्रीच्या वेळी मरीन ड्राइव्ह परिसरातून जात असताना एका अज्ञात व्यक्तीने तिचा पाठलाग केला आणि तिला त्रास देण्याचा प्रयत्न केला. या धक्कादायक प्रकाराचा व्हिडिओ इंटरनेटवर समोर आल्यानंतर महिलांच्या सुरक्षेचा प्रश्न पुन्हा एकदा ऐरणीवर आला होता. पीडित महिलेने सुरुवातीला अधिकृत तक्रार देण्यास नकार दिला होता, मात्र घटनेचे गांभीर्य ओळखून पोलिसांनी स्वतःहून तपास चक्रावे फिरवले.
पोलिसांची भूमिका आणि कारवाई झोन-१ चे पोलीस उपायुक्त (DCP) प्रवीण मुंडे यांनी प्रसारमाध्यमांना दिलेल्या माहितीनुसार, पोलिसांनी आरोपीची ओळख पटवली असून त्याच्यावर कायदेशीर कारवाई करण्याची प्रक्रिया सुरू आहे. “आम्ही व्हिडिओच्या आधारे तपास केला आणि संबंधित व्यक्तीला शोधून काढले आहे,” असे त्यांनी स्पष्ट केले. मुंबई पोलिसांनी दाखवलेल्या या तत्परतेचे सोशल मीडियावर कौतुक होत असले तरी, रात्रीच्या वेळी शहरात महिलांच्या सुरक्षिततेसाठी गस्त वाढवण्याची मागणी नागरिक करत आहेत.