वॉशिंग्टन (pragatbharat.com) : अमेरिकेचे राष्ट्राध्यक्ष डोनाल्ड ट्रम्प यांनी आपल्या आगामी चीन दौऱ्याचे नियोजन स्पष्ट केले असून, या दौऱ्यात तैवान आणि ऊर्जा सुरक्षा हे दोन प्रमुख विषय चर्चेचा केंद्रबिंदू असतील, असे संकेत दिले आहेत. व्हाईट हाऊसमध्ये आयोजित एका कार्यक्रमात बोलताना ट्रम्प यांनी चीनचे राष्ट्राध्यक्ष शी जिनपिंग यांच्याशी असलेल्या आपल्या संबंधांचे कौतुक केले आणि तैवानवरून निर्माण झालेला तणाव वाढणार नाही, असा विश्वास व्यक्त केला.
यावेळी ट्रम्प यांनी मागील बायडेन प्रशासनावर जोरदार टीका केली. “चीनने मागील सरकारचा आदर केला नाही, मात्र आता आमचे प्रशासन चीनसोबत उत्तम कामगिरी करत आहे,” असे त्यांनी नमूद केले. ट्रम्प यांनी चीनच्या आर्थिक हितसंबंधांचा संबंध पश्चिम आशियातील तणावाशी जोडला आहे. चीनला त्यांच्या गरजेच्या ४० टक्के तेलाचा पुरवठा होर्मुझच्या सामुद्रधुनीतून (Strait of Hormuz) होतो, त्यामुळे या भागात शांतता राखणे चीनसाठीही महत्त्वाचे असल्याचे ट्रम्प यांनी सांगितले.
आगामी शिखर परिषदेत ऊर्जा पुरवठा आणि इराण या विषयांवर शी जिनपिंग यांच्याशी सविस्तर चर्चा होणार असल्याचे ट्रम्प यांनी स्पष्ट केले. जागतिक अर्थव्यवस्थेच्या दृष्टीने या दोन महासत्तांमधील ही चर्चा अत्यंत महत्त्वपूर्ण मानली जात आहे.