मुंबई (pragatbharat.com) : मे महिना सुरू होताच राज्यातील शेतकरी बांधव खरीपपूर्व नियोजनाला सुरुवात करतात. अशावेळी कमी कालावधीत आणि अत्यंत कमी खर्चात गगनाला भिडणारा नफा देणाऱ्या पिकांकडे शेतकऱ्यांचा कल वाढतो. जर तुम्हीही या उन्हाळ्यात बंपर कमाईचा विचार करत असाल, तर कोथिंबीर (Kothimbir) लागवड तुमच्यासाठी एक ‘गोल्डन चान्स’ ठरू शकते. वर्षभर बाजारात मोठी मागणी असलेल्या कोथिंबीरीची मे महिन्यात योग्य नियोजन करून लागवड केल्यास, अवघ्या ३५ ते ४५ दिवसांत शेतकरी लाखोंचा नफा कमवू शकतात.
उन्हाळ्यात मागणी जास्त, पुरवठा कमी: कोथिंबीरीचा वापर घरगुती स्वयंपाकापासून ते हॉटेल, रेस्टॉरंट आणि फास्टफूड व्यवसायात मोठ्या प्रमाणावर केला जातो. उन्हाळ्यात तीव्र उष्णतेमुळे बाजारात कोथिंबीरीची आवक घटते, मात्र मागणी प्रचंड वाढते. यामुळे मे महिन्यात लागवड करणाऱ्या शेतकऱ्यांना जून-जुलैच्या सुरुवातीला ऐतिहासिक बाजारभाव मिळण्याची दाट शक्यता असते. ३५ अंश सेल्सिअसपेक्षा जास्त तापमान झाल्यास कोथिंबीरीची वाढ खुंटते, त्यामुळे उन्हाळ्यात पाणी व्यवस्थापन आणि सावलीची काळजी घेणे आवश्यक आहे.
लागवडीची पद्धत आणि बियाण्यांचे गणित:
- जमीन आणि खत : कोथिंबीर पिकासाठी मध्यम कसदार जमीन उत्तम मानली जाते. लागवडीपूर्वी जमीन नांगरून भुसभुशीत करावी आणि एकरी ६ ते ८ टन कुजलेले शेणखत मिसळावे.
- बियाणे प्रमाण : एकरी साधारणपणे २५ ते ३५ किलो बियाणे लागते. पेरणीपूर्वी धने हलक्या हाताने फोडून, ते गोणपाटात गुंडाळून ठेवल्यास अवघ्या ८ ते १० दिवसांत जलद उगवण होते.
- सुधारित जाती : उन्हाळी हंगामासाठी लाम सीएस-२, लाम सीएस-४, लाम सीएस-६ (भुरी रोग प्रतिकारक), को-१ आणि कोकण कृषी विद्यापीठाने विकसित केलेली अधिक सुगंधी ‘कोकण कस्तुरी’ या जाती अत्यंत फायदेशीर ठरतात.
भरघोस उत्पादनासाठी खत व्यवस्थापन: बियाण्यांची उगवण झाल्यानंतर साधारण २० दिवसांनी हेक्टरी ४० किलो नत्र द्यावे. तसेच पिकाची जोमदार वाढ होण्यासाठी १०० लिटर पाण्यात २५० ग्रॅम युरिया मिसळून त्याची फवारणी करण्याचा सल्ला कृषी तज्ज्ञांनी दिला आहे.
