मुंबई (pragatbharat.com) : मुंबईच्या छत्रपती शिवाजी महाराज आंतरराष्ट्रीय विमानतळावर (CSMI Airport) महसूल गुप्तवार्ता निर्देशनालय म्हणजेच ‘डीआरआय’ने (DRI) एक मोठी कारवाई केली आहे. डीआरआयने राबवलेल्या ‘ऑपरेशन गोल्डन ड्रॉप’ (Operation Golden Drop) अंतर्गत विमानतळावर तब्बल ३ किलो विदेशी सोन्याची तस्करी उघडकीस आणली आहे. जप्त करण्यात आलेल्या या सोन्याची आंतरराष्ट्रीय बाजारातील किंमत ४ कोटी ८० लाख रुपये एवढी आहे. या कारवाईदरम्यान डीआरआयने आंतरराष्ट्रीय सोन्याच्या तस्करीचे मोठे सिंडिकेट उध्वस्त केले असून, एका आरोपीला अटक केली आहे.
कैप्सूलच्या रूपात सोन्याची तस्करी (मोडस ऑपरेंडी): डीआरआयच्या अधिकाऱ्यांना मिळालेल्या एका अचूक गुप्त माहितीच्या आधारे ही कारवाई करण्यात आली. तपास यंत्रणांनी दिलेल्या माहितीनुसार, या सिंडिकेटने सोन्याच्या तस्करीसाठी अत्यंत नियोजनबद्ध आणि क्लिष्ट पद्धत वापरली होती. तस्करांनी सर्वप्रथम सोन्याच्या भुकटीचे (Gold Dust) मेणामध्ये (Wax) रूपांतर केले आणि नंतर ती सोन्याची पेस्ट अंडीच्या आकाराच्या विशेष कॅप्सूलमध्ये भरली. कस्टम विभागाच्या तपासणीतून वाचण्यासाठी ट्रान्झिट (Transit) प्रवाशांनी या कॅप्सूल चक्क गिळल्या (Swallowed) होत्या आणि त्या शरीरात लपवून मुंबईत आणल्या होत्या.
विमानतळावरील कर्मचाऱ्याचे मिळाले ‘इन्सायडर’ सपोर्ट: या संपूर्ण गैरव्यवहारात विमानतळाच्या आतील सुरक्षेला भगदाड पाडणारा धक्कादायक प्रकार समोर आला आहे. प्रवाशांनी आणलेले हे सोने विमानतळ परिसरातील एका फूड आउटलेटमध्ये (Food Outlet) काम करणाऱ्या सफाई कर्मचाऱ्याकडे सुपूर्द केले जाणार होते. हा कर्मचारी या सोन्याच्या कॅप्सूल विमानतळाबाहेर सुरक्षितपणे पोहोचवण्यास मदत करणार होता. डीआरआयने सापळा रचून या कर्मचाऱ्याला रंगेहाथ पकडले असून, त्याला अटक करण्यात आली आहे. विमानतळाच्या सपोर्ट सेवांचा गैरवापर करून कस्टम ड्युटी आणि सरकारी करांची चोरी करण्याचा या सिंडिकेटचा हा मोठा कट होता.
डायमंड तस्करीचेही रॅकेट आले होते समोर: यापूर्वी १४ मे २०२६ रोजी देखील डीआरआयने मुंबई विमानतळावर मोठी कारवाई केली होती. त्यावेळी बँकॉकला तस्करीच्या उद्देशाने घेऊन जाण्यात येणारे ५ कोटी ७० लाख रुपयांचे हिरे (Diamonds) जप्त करण्यात आले होते. त्या प्रकरणातही दोन प्रवाशांनी हिऱ्यांच्या कॅप्सूल आपल्या शरीरात लपवल्या होत्या आणि वैद्यकीय तपासणीनंतर त्यांच्याकडून १,६२४ कॅरेटचे नैसर्गिक आणि लॅब-ग्रोन हिरे जप्त करण्यात आले होते. आंतरराष्ट्रीय मनी लाँड्रिंगशी या दोन्ही प्रकरणांचे धागेदोरे जोडलेले असण्याची शक्यता असून, डीआरआय सध्या या संपूर्ण आंतरराष्ट्रीय सिंडिकेटचा कसून तपास करत आहे.