मुंबई (pragatbharat.com) : जागतिक स्तरावर फॅशन आणि सिनेमाचे सर्वात मोठे व्यासपीठ मानल्या जाणाऱ्या प्रतिष्ठेच्या ७९ व्या कान्स फिल्म फेस्टिव्हलमध्ये (Cannes Film Festival 2026) बॉलिवूडची ‘ग्लोबल क्वीन’ ऐश्वर्या राय बच्चन हिच्या आगमनाने पुन्हा एकदा जगभरातील साऱ्यांच्या नजरा खिळल्या आहेत. दरवर्षीप्रमाणे यंदाही ऐश्वर्याने आपल्या अत्यंत देखण्या, भव्य आणि हटके अंदाजाने कान्सचे रेड कार्पेट पूर्णपणे गाजवले असून सोशल मीडियावर तिचे फोटो तुफान व्हायरल होत आहेत.
१५०० तासांच्या मेहनतीतून साकारला ‘लुमिनारा’ गाऊन यंदा कान्सच्या रेड कार्पेटसाठी ऐश्वर्याने भारताचे प्रसिद्ध फॅशन डिझायनर अमित अग्रवाल यांनी डिझाइन केलेला एक अत्यंत खास आणि अनोखा कुट्युर गाऊन परिधान केला होता. ‘लुमिनारा’ (Luminara) असे नाव असलेल्या या विशेष ड्रेसची मुख्य संकल्पना ‘प्रकाशाची हालचाल’ (The Movement of Light) अशी ठेवण्यात आली होती. हा अद्वितीय आणि क्लिष्ट ड्रेस तयार करण्यासाठी कारागिरांना तब्बल १५०० तास अविरत मेहनत घ्यावी लागली. यात अमित अग्रवाल यांच्या खास ‘क्रिस्टल व्हेन’ एम्ब्रॉयडरी तंत्राचा वापर करण्यात आला होता.
प्रकाशानुसार छटा बदलणारे ‘अॅबिस ब्लू’ फॅशन स्टेटमेंट हजारो चकचकीत क्रिस्टल एम्बेलिशमेंट्सनी सजवलेल्या या गाऊनचे मुख्य वैशिष्ट्य म्हणजे, ऐश्वर्या जेव्हा रेड कार्पेटवर चालत होती, तेव्हा तिथल्या प्रकाशानुसार आणि तिच्या हालचालींनुसार हा ड्रेस सतत आपल्या छटा बदलत होता. ड्रेसची रचना अशा पद्धतीने करण्यात आली होती की, प्रकाश पडताच त्याचा प्रत्येक भाग वेगळ्या रंगाने उजळून निघत होता. ‘अॅबिस ब्लू’ (Abis Blue) रंगातील या ड्रेसमधून अवकाशातील अथांगता आणि प्रकाशाचा अनंत प्रवास दाखवण्याचा यशस्वी प्रयत्न करण्यात आला.
प्रसिद्ध स्टायलिस्ट मोहित राय यांनी ऐश्वर्याचा हा भव्य लूक साकारला होता. या गाऊनच्या खांद्यांवरील पंखांसारखी डिझाईन (Winged Design) आणि स्ट्रक्चर्ड सिल्हुएटमुळे तिचा संपूर्ण अवतार एखाद्या ‘रॉयल फॅशन स्टेटमेंट’ सारखा भासत होता. या लूकबद्दल बोलताना डिझायनर अमित अग्रवाल म्हणाले की, “ऐश्वर्या राय नेहमीच कान्समध्ये स्वतःची एक वेगळी आणि अमिट छाप सोडते, आणि यंदाचा हा लूक तिच्या सौंदर्याला जागतिक स्तरावर एक नवीन उंची देणारा ठरला आहे.”