मुंबई (pragatbharat.com) : बॉलिवूडचा सुपरस्टार अभिनेता रणवीर सिंहबद्दल चित्रपटसृष्टीतून एक अत्यंत मोठी आणि धक्कादायक बातमी समोर आली आहे. फेडरेशन ऑफ वेस्टर्न इंडिया सिने एम्प्लॉईजने (FWICE) रणवीर सिंहवर थेट बंदी घालण्याचे आदेश दिले असून त्याच्याविरोधात असहकाराचा (Non-cooperation) आदेश जारी केला आहे. ‘डॉन ३’ (Don 3) या बहुप्रतिक्षित चित्रपटाच्या शूटिंगला सुरुवात होण्याच्या अवघ्या काही दिवस आधीच रणवीरने अचानक माघार घेतल्यामुळे फेडरेशनने ही मोठी कारवाई केली आहे.
४५ कोटींचे नुकसान आणि क्रिएटिव्ह मतभेद: ‘डॉन ३’ चित्रपटाचे दिग्दर्शक फरहान अख्तर आणि निर्माता रितेश सिधवानी यांनी रणवीरविरोधात तक्रार दाखल केली होती. निर्मात्यांच्या दाव्यानुसार, चित्रपटाच्या प्री-प्रॉडक्शनवर आतापर्यंत ४५ कोटी रुपयांहून अधिक खर्च झाला आहे, ज्यामध्ये २०० हून अधिक कर्मचाऱ्यांचे हॉटेल आणि परदेश प्रवासाचे बुकिंग समाविष्ट होते. रणवीरला ‘डॉन’ या भूमिकेचा अधिक डार्क आणि आक्रमक अंदाज हवा होता, मात्र फरहान अख्तरच्या संकल्पनेशी मतभेद झाल्याने त्याने युनिट निघण्याच्या तीन आठवडे आधी चित्रपट सोडला. फेडरेशनने रणवीरला बाजू मांडण्यासाठी तीनवेळा बोलावूनही त्याने प्रतिसाद न दिल्याने अखेर हा कडक निर्णय घेण्यात आला. “कोणताही सुपरस्टार कायद्यापेक्षा मोठा नाही,” असे फेडरेशनचे अध्यक्ष बी. एन. तिवारी यांनी स्पष्ट केले.
वादावर रणवीर सिंहची प्रतिक्रिया: या संपूर्ण वादावर पहिल्यांदाच आपले मौन सोडत रणवीर सिंहने एक अधिकृत निवेदन जारी केले आहे. रणवीरने म्हटले आहे की, “मला ‘डॉन’ फ्रँचाइझीशी संबंधित प्रत्येकाबद्दल आदर आहे. परंतु व्यावसायिक चर्चा आणि वैयक्तिक संबंध हे प्रतिष्ठा, समजूतदारपणा आणि परस्पर आदराने हाताळले पाहिजेत.” सध्या तो कोणत्याही अफवांना खतपाणी न घालता त्याच्या भविष्यातील इतर प्रोजेक्ट्सवर लक्ष केंद्रित करत असल्याचे त्याने निवेदनात स्पष्ट केले आहे.
