मुंबई (pragatbharat.com) : महाराष्ट्राच्या राजकीय आणि सामाजिक वर्तुळातून एक अत्यंत मोठी आणि खळबळजनक बातमी समोर येत आहे. प्रसिद्ध सामाजिक कार्यकर्त्या अंजली दमानिया यांनी राष्ट्रवादी काँग्रेसचे ज्येष्ठ नेते आणि राज्याचे अन्न व नागरी पुरवठा मंत्री छगन भुजबळ यांच्यावर भ्रष्टाचाराचे गंभीर आरोप केले आहेत. पार्थ पवारांनंतर राष्ट्रवादी काँग्रेसचा आणखी एक बडा नेता दमानिया यांच्या निशाण्यावर आल्यामुळे राज्याच्या राजकारणात एकच खळबळ उडाली आहे.
अंजली दमानिया यांनी पत्रकार परिषदेत माहिती देताना थेट आरोप केला आहे की, राज्यातील साडेचार हजार कोटी रुपयांच्या रेशन धान्य वाहतुकीच्या कंत्राटात मोठ्या प्रमाणावर टक्केवारी (कमिशन) मागितली जात आहे. गेल्या २६ वर्षांपासून वारंवार ठराविक कंपन्यांनाच हे धान्य वाहतुकीचे काम दिले जात असल्याचे त्यांनी निदर्शनास आणून दिले. याप्रकरणी उच्च न्यायालयाने (High Court) वर्क ऑर्डर जारी न करण्याचे स्पष्ट निर्देश दिले असतानाही, केवळ टक्केवारीसाठी घाईघाईने वर्क ऑर्डर काढली जात असल्याचा खळबळजनक दावा त्यांनी केला आहे. दमानिया यांनी हे संबंधित कंत्राट तातडीने रद्द करण्याची मागणी सरकारकडे केली आहे.
MSRDC चे चेअरमन अनिल कुमार गायकवाड यांच्यावरही आरोप अंजली दमानिया यांनी केवळ छगन भुजबळ यांच्यावरच नव्हे, तर महाराष्ट्र राज्य रस्ते विकास महामंडळाचे (MSRDC) चेअरमन अनिल कुमार गायकवाड यांच्यावरही गंभीर आर्थिक अनियमिततेचा आरोप केला आहे. गायकवाड यांनी एचडीएफसी (HDFC) बँकेत ४५ कोटी रुपयांच्या ठेवी (FDR) ठेवून भारतीय रिझर्व्ह बँकेच्या (RBI) नियमांची सर्रास पायमल्ली केल्याचा दावा दमानिया यांनी केला. केवळ जादा व्याजदराच्या हव्यासापोटी सरकारी नियम धाब्यावर बसवून ही फसवणूक करण्यात आली असून, याप्रकरणी तात्काळ गुन्हा दाखल करून उच्चस्तरीय चौकशी करावी, अशी मागणी त्यांनी केली आहे.
भ्रष्टाचाराची विविध प्रकरणे सातत्याने बाहेर काढणाऱ्या अंजली दमानिया यांच्या या नव्या आरोपांमुळे अन्न व नागरी पुरवठा विभाग आणि रस्ते विकास महामंडळ चौकशीच्या फेऱ्यात अडकण्याची शक्यता निर्माण झाली आहे. या गंभीर आरोपांवर आता मंत्री छगन भुजबळ किंवा शासनाकडून काय स्पष्टीकरण येते, याकडे संपूर्ण महाराष्ट्राचे लक्ष लागले आहे.
