सोलापूर (pragatbharat.com) : सोलापूर स्थानिक स्वराज्य संस्था मतदारसंघ विधान परिषद निवडणुकीच्या छाननी प्रक्रियेदरम्यान एक अत्यंत धक्कादायक आणि खळबळजनक प्रकार उघडकीस आला आहे. ‘न्यू राष्ट्रीय समाज पार्टी’चे अधिकृत उमेदवार अशोक वाघमोडे यांनी उमेदवारी अर्जावर सूचकांच्या बोगस आणि बनावट सह्या (Bogus Signatures) करून निवडणूक यंत्रणेची फसवणूक केल्याचे सिद्ध झाले आहे. हा गंभीर गैरप्रकार समोर आल्यानंतर निवडणूक निर्णय अधिकाऱ्यांनी वाघमोडे यांचा अर्ज थेट बाद (Rejected) केला असून त्यांच्यावर आता फौजदारी गुन्हा दाखल होण्याची दाट शक्यता निर्माण झाली आहे.
१० पैकी ५ सूचकांनी थेट निवडणूक अधिकाऱ्यांसमोर उघडली पोल: नियम पुस्तिकेनुसार, विधान परिषद उमेदवारी अर्जासोबत स्थानिक स्वराज्य संस्थांमधील १० लोकप्रतिनिधींची नावे सूचक व अनुमोदक म्हणून जोडणे बंधनकारक असते. अशोक वाघमोडे यांनी सादर केलेल्या अर्जाची छाननी सुरू असतानाच या प्रकरणाला नाट्यमय वळण मिळाले. अर्जावर नाव असलेल्या १० सदस्यांपैकी ५ सदस्यांनी थेट जिल्हाधिकारी तथा निवडणूक निर्णय अधिकाऱ्यांसमोर प्रत्यक्ष हजर राहून लेखी प्रतिज्ञापत्र (Affidavit) सादर केले. “आम्ही उमेदवार अशोक वाघमोडे यांना ओळखत नाही आणि या अर्जावरील सह्या आमच्या नाहीत,” असा खळबळजनक दावा या सदस्यांनी केला.
जिल्हाधिकाऱ्यांची मोठी कारवाई आणि नगरसेविका आक्रमक: सूचकांनी प्रत्यक्ष दिलेली साक्ष आणि कायदेशीर प्रतिज्ञापत्रे लक्षात घेऊन सोलापूरच्या जिल्हाधिकाऱ्यांनी अशोक वाघमोडे यांचा उमेदवारी अर्ज तांत्रिक आणि कायदेशीर निकषांवर अवैध ठरवत फेटाळून लावला. यामुळे वाघमोडे यांचा निवडणुकीच्या रिंगणात उतरण्यापूर्वीच पत्ता कट झाला आहे. दरम्यान, आपल्या स्वाक्षरीचा इतका मोठा गैरवापर झाल्याचे पाहून संबंधित लोकप्रतिनिधी व नगरसेविका कमालीच्या संतप्त झाल्या आहेत. लोकशाही आणि निवडणूक प्रक्रियेची थट्टा उडवणाऱ्या वाघमोडे यांच्यावर तात्काळ गुन्हा दाखल करून कडक कारवाई करण्याची मागणी प्रशासनाकडे करण्यात आली आहे.
