नाशिक (pragatbharat.com) : राज्यभरात आगामी विधान परिषदेच्या १७ जागांसाठी (Vidhan Parishad Election 2026) राजकीय धुमश्चक्री सुरू असताना, नाशिक स्थानिक स्वराज्य संस्था मतदारसंघाच्या जागेवरून महायुतीत निर्माण झालेला मोठा तिढा अखेर सुटला आहे. सूत्रांकडून मिळालेल्या खळबळजनक माहितीनुसार, नाशिकमधील बंडखोरी रोखण्यात महायुतीच्या सर्वोच्च नेत्यांना यश आले असून, अपक्ष बंडखोर उमेदवार गोकुळ गिते हे आता शिवसेनेचे (शिंदे गट) अधिकृत उमेदवार नरेंद्र दराडे यांना आपला जाहीर पाठिंबा देणार आहेत. या नाट्यमय घडामोडीमुळे शिवसेनेचे आणि प्रामुख्याने विद्यमान आमदार नरेंद्र दराडे यांचे राजकीय टेन्शन पूर्णपणे मिटले असून, त्यांच्या विजयाचा मार्ग आता अधिक सुकर झाला आहे.
असा रंगला होता नाशिकचा उमेदवारी अर्ज ड्रामा नाशिक विधान परिषद जागेसाठी महायुतीमध्ये सुरुवातीला प्रचंड रस्सीखेच पाहायला मिळाली होती. जागावाटपाचा अधिकृत निर्णय होण्यापूर्वीच भाजपचे नाशिकमधील नेते गणेश गिते यांनी आपला उमेदवारी अर्ज दाखल केला होता; तर त्यांचे बंधू गोकुळ गिते यांनी देखील अपक्ष म्हणून अर्ज भरला होता. मात्र, त्यानंतर महायुतीच्या जागावाटपात ही जागा मुख्यमंत्री एकनाथ शिंदे यांच्या शिवसेनेच्या वाट्याला आली आणि पक्षाने नरेंद्र दराडे यांना एबी फॉर्म (अधिकृत उमेदवारी) दिला. जागा शिवसेनेला सुटल्यानंतर भाजपच्या वरिष्ठांच्या सूचनेनुसार गणेश गिते यांनी उमेदवारी अर्ज मागे घेण्याच्या शेवटच्या दिवशी आपला अर्ज मागे घेतला. मात्र, त्यांचे भाऊ गोकुळ गिते यांनी आपला अपक्ष अर्ज कायम ठेवत निवडणूक लढवण्याचा पवित्रा घेतल्याने महायुतीसमोर, विशेषतः शिवसेनेसमोर मोठे संकट उभे राहिले होते.
महाजन आणि उदय सामंत यांच्या मध्यस्थीला मोठे यश गोकुळ गिते यांच्या बंडखोरीमुळे महायुतीच्या मतांमध्ये मोठी फूट पडून त्याचा थेट फायदा विरोधकांना मिळण्याची दाट शक्यता होती. त्यामुळे ही बंडखोरी मोडीत काढण्यासाठी भाजपचे संकटमोचक समजले जाणारे मंत्री गिरीश महाजन आणि शिवसेनेचे उच्च व तंत्रशिक्षण मंत्री उदय सामंत हे गेल्या दोन दिवसांपासून नाशिकमध्ये तळ ठोकून होते. गितेंची समजूत काढण्यासाठी दोन्ही मंत्र्यांनी त्यांच्याशी अत्यंत गुप्त आणि सकारात्मक चर्चा केली. अखेर, महायुतीचा धर्म पाळत आणि नेत्यांच्या शब्दाचा मान ठेवत गोकुळ गिते यांनी माघार घेत नरेंद्र दराडे यांना पाठिंबा देण्याचे मान्य केल्याचे सूत्रांनी सांगितले. नाशिकच्या या जागेवर यशस्वी तोडगा निघाल्याने शिवसेना आणि भाजप कार्यकर्त्यांमध्ये आता उत्साहाचे वातावरण असून दराडे यांचा मार्ग मोकळा झाला आहे.
