मुंबई (pragatbharat.com) :
महाराष्ट्रातील महिला उद्योजकांना प्रोत्साहन देण्यासाठी आणि त्यांच्या पंखांना बळ देण्यासाठी राज्य शासनाने एक अत्यंत महत्त्वाचे पाऊल उचलले आहे. कौशल्य, रोजगार, उद्योजकता व नावीन्यता विभागांतर्गत महाराष्ट्र राज्य नावीन्यता सोसायटी आणि उदैती फाउंडेशन यांच्यात एक महत्त्वपूर्ण सामंजस्य करार (MoU) करण्यात आला आहे. या भागीदारीतून महाराष्ट्रात विशेष ‘महिला उद्योजकता स्टार्ट अप हब’ स्थापन करण्यात येणार असल्याची घोषणा मुख्यमंत्री देवेंद्र फडणवीस यांनी केली आहे.
महिलांच्या आर्थिक सक्षमीकरणाला मिळणार गती: मुख्यमंत्री देवेंद्र फडणवीस यांनी सांगितले की, या कराराअंतर्गत महाराष्ट्र राज्य नावीन्यता सोसायटी आणि उदैती फाउंडेशन हे तांत्रिक व ज्ञान भागीदार (Technical and Knowledge Partners) म्हणून एकत्र काम करतील. या उपक्रमाच्या माध्यमातून महिला उद्योजकांना वित्तपुरवठा (Funding), बाजारपेठ आणि व्यवसाय सहाय्य मिळवून दिले जाईल, ज्यामुळे राज्यातील महिलांच्या आर्थिक सक्षमीकरणाला मोठी चालना मिळणार आहे.
कौशल्य, रोजगार, उद्योजकता व नावीन्यता मंत्री मंगलप्रभात लोढा यांच्या नेतृत्वाखाली हा करार पार पडला. नावीन्यता सोसायटीचे मुख्य कार्यकारी अधिकारी डॉ. श्रीकांत पाटील आणि उदैती फाउंडेशनच्या संस्थापक मुख्य कार्यकारी अधिकारी पूजा शर्मा गोयल यांनी या करारावर स्वाक्षऱ्या केल्या.
अॅक्सेलरेटर मॉडेल आणि गव्हर्नन्स डॅशबोर्ड: हे महिला स्टार्ट अप हब राज्यातील स्टार्ट अप परिसंस्थेमध्ये समन्वय साधणारे मुख्य व्यासपीठ म्हणून काम करेल.
- अॅक्सेलरेटर मॉडेल (Accelerator Model): महिला-नेतृत्वाखालील उद्योगांसाठी विशेष मॉडेल तयार करून त्यांना मार्गदर्शन, उद्योग क्षेत्राची गरज आणि केंद्र व राज्य शासनाच्या योजनांशी जोडण्याचे काम केले जाईल.
- महिला स्टार्ट अप निर्देशांक (WE Index): राज्यासाठी महिला स्टार्ट अप निर्देशांक विकसित केला जाईल, ज्याद्वारे जिल्हा आणि विभागनिहाय लिंग-विभागित आकडेवारीचा (Gender-disaggregated data) आढावा घेता येईल.
- गव्हर्नन्स डॅशबोर्ड (Governance Dashboard): विविध विभागांची आणि जिल्ह्यांची कामगिरी तपासण्यासाठी डॅशबोर्ड विकसित केला जाईल, ज्यामुळे पारदर्शकता आणि निर्णयप्रक्रिया सुलभ होईल. तसेच यासाठी एक आंतरविभागीय संचालन समिती देखील स्थापन केली जाणार आहे.
१५६ दशलक्ष महिलांना रोजगाराच्या प्रवाहात आणण्याचे उद्दिष्ट: उदैती फाउंडेशन हे भारतातील महिलांच्या उद्योग क्षेत्रातील सहभागाला गती देण्यासाठी काम करते. राज्य शासन आणि खासगी क्षेत्राच्या मदतीने तब्बल १५६ दशलक्ष रोजगारक्षम परंतु सध्या बेरोजगार असलेल्या महिलांना रोजगाराच्या मुख्य प्रवाहात आणण्याचे या संस्थेचे उद्दिष्ट आहे. महिलांच्या मार्गातील अडथळे दूर करून, निवास आणि बालसंगोपन यांसारख्या पायाभूत सुविधा बळकट करत ‘विकसित भारत २०४७’ या राष्ट्रीय दृष्टिकोनाला गती देण्याचे काम या कराराच्या माध्यमातून केले जाईल.
