महिला व बालकांच्या सक्षमीकरणासाठी योजनांची प्रभावी अंमलबजावणी करणार : सभापती राणी पठारे

PCMC: पात्र लाभार्थ्यांपर्यंत कल्याणकारी योजनांची माहिती पोहोचविण्यासाठी विशेष जनजागृतीवर भर!

पिंपरी- चिंचवड | (pragatbhara)महिला व बालकांच्या सामाजिक आणि आर्थिक सक्षमीकरणासाठी पिंपरी-चिंचवड महानगरपालिकेमार्फत राबविण्यात येणाऱ्या विविध कल्याणकारी योजनांचा लाभ प्रत्येक पात्र लाभार्थ्यापर्यंत पोहोचविण्यास प्राधान्य देण्यात येणार आहे. माहितीचा अभाव किंवा तांत्रिक अडचणींमुळे कोणताही पात्र लाभार्थी योजनेपासून वंचित राहणार नाही, यासाठी महिला व बालकल्याण समिती आणि महापालिका प्रशासन यांच्यात प्रभावी समन्वय ठेवण्यात येईल, अशी भूमिका महिला व बालकल्याण समितीच्या सभापती राणी पठारे यांनी मांडली.

पिंपरी-चिंचवड महानगरपालिकेच्या समाज विकास विभागामार्फत सन २०२६-२७ या आर्थिक वर्षात राबविण्यात येणाऱ्या विविध कल्याणकारी योजनांच्या अर्ज स्वीकृती प्रक्रियेचा शुभारंभ महापौर रवि लांडगे यांच्या हस्ते करण्यात आला. यावेळी महिला व बालकल्याण समितीच्या माध्यमातून महिला, बालके, दिव्यांग व्यक्ती, मागासवर्गीय तसेच गरजू आणि वंचित घटकांसाठी राबविण्यात येणाऱ्या योजनांच्या प्रभावी अंमलबजावणीबाबत चर्चा करण्यात आली.

महापालिकेच्या कल्याणकारी योजनांची माहिती पात्र महिला आणि गरजू कुटुंबांपर्यंत प्रभावीपणे पोहोचविण्यासाठी व्यापक जनजागृती करण्यात यावी, अशी सूचना राणी पठारे यांनी केली. योजनांसाठी अर्ज करताना आवश्यक असलेली कागदपत्रे, पात्रतेचे निकष, अर्ज सादर करण्याची पद्धत आणि अर्जांची अंतिम मुदत याबाबतची माहिती नागरिकांना सोप्या आणि स्पष्ट स्वरूपात उपलब्ध करून देण्यावर त्यांनी भर दिला.

ऑनलाईन अर्ज प्रक्रिया पूर्ण करताना अनेक महिला, ज्येष्ठ नागरिक आणि दिव्यांग व्यक्तींना तांत्रिक अडचणींचा सामना करावा लागतो. अशा नागरिकांसाठी आवश्यक मार्गदर्शन आणि प्रत्यक्ष सहाय्य उपलब्ध करून देण्यात यावे. आवश्यकतेनुसार ऑफलाईन अर्ज स्वीकारण्याची सुविधाही उपलब्ध करून द्यावी, जेणेकरून तांत्रिक कारणांमुळे पात्र लाभार्थी योजनांच्या लाभापासून वंचित राहणार नाहीत, असेही राणी पठारे यांनी सांगितले.

“महिला व बालकांच्या सामाजिक आणि आर्थिक सक्षमीकरणाच्या दृष्टीने महानगरपालिकेमार्फत विविध कल्याणकारी योजना राबविण्यात येत आहेत. या योजनांची माहिती प्रत्येक पात्र महिला आणि लाभार्थ्यापर्यंत पोहोचविणे आवश्यक आहे. अर्ज प्रक्रियेसाठी योग्य मार्गदर्शन व सहाय्य उपलब्ध करून देण्यास आम्ही प्राधान्य देणार आहोत. माहितीच्या अभावामुळे किंवा तांत्रिक अडचणींमुळे कोणताही पात्र लाभार्थी योजनेपासून वंचित राहणार नाही, यासाठी महिला व बालकल्याण समिती आणि प्रशासन यांच्यात समन्वय ठेवून योजनांची प्रभावी अंमलबजावणी केली जाईल,” असे राणी पठारे यांनी स्पष्ट केले.

हेही वाचा

साडीत कंबर दिसते, यात अश्लीलता काय? पुण्यात गुन्हा दाखल झाल्यानंतर राधा पाटीलचा संताप

प्राप्त अर्जांची विहित निकषांनुसार छाननी करून पात्र लाभार्थ्यांची पारदर्शक पद्धतीने निवड करण्यात यावी. मंजूर योजनांचा लाभ निर्धारित कालमर्यादेत लाभार्थ्यांना मिळावा, यासाठी समाज विकास विभागाने नियोजनबद्ध आणि गतिमान कार्यवाही करावी, अशा सूचनाही यावेळी देण्यात आल्या.

महापौर रवि लांडगे यांनीही महानगरपालिकेच्या कल्याणकारी योजनांचा लाभ प्रत्येक पात्र लाभार्थ्यापर्यंत पोहोचविणे आवश्यक असल्याचे सांगितले. अर्ज प्रक्रियेत पारदर्शकता आणि सुलभता राखून प्राप्त अर्जांवर वेळेत कार्यवाही करण्याचे निर्देश त्यांनी संबंधित अधिकाऱ्यांना दिले.

याप्रसंगी उपमहापौर शर्मिला बाबर, विरोधी पक्षनेते भाऊसाहेब भोईर, महिला व बालकल्याण समितीच्या सभापती राणी पठारे, समिती सदस्या पल्लवी जगताप, रेशमा भुजबळ, निता पाडाळे, सुप्रिया चांदगुडे, सारिका मासुळकर, मनिषा लांडे, अतिरिक्त आयुक्त विक्रांत बगाडे, उपायुक्त ममता शिंदे यांच्यासह समाज विकास विभागाचे अधिकारी आणि कर्मचारी उपस्थित होते.

महिला व बालकल्याण समितीच्या माध्यमातून योजनांची माहिती तळागाळातील महिला आणि गरजू कुटुंबांपर्यंत पोहोचविण्यासाठी सातत्यपूर्ण जनजागृती केली जाणार आहे. पात्र नागरिकांनी विहित मुदतीत आवश्यक कागदपत्रांसह अर्ज सादर करून महानगरपालिकेच्या कल्याणकारी योजनांचा लाभ घ्यावा, असे आवाहन राणी पठारे यांनी केले.

“महिला व बालकांचे सामाजिक आणि आर्थिक सक्षमीकरण हे आमचे प्रमुख उद्दिष्ट आहे. महापालिकेच्या विविध कल्याणकारी योजनांची माहिती प्रत्येक पात्र लाभार्थ्यापर्यंत पोहोचवून त्यांना अर्ज प्रक्रियेसाठी आवश्यक मार्गदर्शन व सहाय्य उपलब्ध करून दिले जाईल. माहितीचा अभाव किंवा तांत्रिक अडचणींमुळे कोणतीही पात्र महिला अथवा लाभार्थी योजनेच्या लाभापासून वंचित राहणार नाही, याची दक्षता घेतली जाईल. महिला व बालकल्याण समिती आणि महापालिका प्रशासन यांच्यात योग्य समन्वय राखून योजनांची पारदर्शक, सुलभ आणि प्रभावी अंमलबजावणी करण्यास आम्ही प्राधान्य देणार आहोत.”

– राणी पठारे, सभापती, महिला व बालकल्याण समिती, पिंपरी-चिंचवड महानगरपालिका.